«Էլեկտրիկ Երեւանի» դեպքերի ժամանակ լրագրողների մասնագիտական գործունեությունը խոչընդոտելու վերաբերյալ գործը կքննի նախկին քննիչ, ներկայումս դատավոր Արշակ Վարդանյանը:
Այս գործով ամբաստանյալի կարգավիճակում ոստիկանության 4 աշխատակից կա: Ըստ մեղադրական եզրակացության՝ Տաճատ Նորատունկյանը, Արթուր Այվազյանը, Կոստան Բուդաղյանը եւ Դավիթ Փերիխանյանը հանդիսացել են պաշտոնատար անձ եւ օգտագործել իրենց պաշտոնեական դիրքը: Այն է՝ 2015թ. հունիսի 23-ին Ազատության հրապարակում խոչընդոտել են «Ֆոտոլուր» լրատվական գործակալության ֆոտոլրագրող Հայկ Բադալյանի մասնագիտական օրինական գործունեությանը եւ ապօրինաբար նրան բերման ենթարկել՝ խոչընդոտելով վերջինիս աշխատանքը, «Արմենիա» հեռուստաընկերության լրագրող Խաչատուր Եսայանի մասնագիտական օրինական գործունեությանը, ինչպես նաեւ Աշոտ Բոյաջյանի, լրագրող Արթուր Պապյանի մասնագիտական օրինական գործունեությանը:
Տաճատ Նորատունկյանին, Արթուր Այվազյանին, Կոստան Բուդաղյանին մեղադրանք է առաջադրվել Քրեական օրենսգրքի 164-րդ հոդվածի 2-րդ մասի 2-րդ կետով, իսկ Դավիթ Փերիխանյանին՝ ՔՕ 164-րդ եւ 185-րդ հոդվածների 1-ին մասերով: Նրանց նկատմամբ խափանման միջոց է ընտրվել ստորագրություն չհեռանալու մասին:
Գործը քննվելու է Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում: