Վիննիցայում տեղի է ունեցել Հայոց ցեղասպանության զոհերին նվիրված հիշատակի խաչքարի բացում եւ օծում, հայտնում է Analitikaua-ն:
Խաչքարը, որը տեղադրվել է Սուրբ Հարության տաճարի կողքին, օծել է Հայ առաքելական եկեղեցու Ուկրաինայի թեմի առաջնորդ, եպիսկոպոս Մարկոս Հովհաննիսյանը:
Ուկրաինայի հայերի միության գործադիր տնօրեն Դավիթ Մկրտչյանը հայտնել է, որ բացման արարողությանը ներկա են եղել քաղաքային իշխանության, ուղղափառ եկեղեցու, Ուկրաինայի հայերի միության, Վիննիցայի եւ երկրի այլ շրջանների հայ համայնքների, շրջանի ազգային փոքրամասնությունների ներկայացուցիչներ, քաղաքի բնակիչներ:
Իր ելույթում «Վիննիչինայի հայկական սփյուռք» շրջանային կազմակերպության նախագահ Սամվել Եղոյանը պատմել է խաչքարի եւ նրա նշանակության մասին:
Ավելի վաղ հաղորդվել էր, որ Ուկրաինայի հայերի միության ղեկավար Վիլեն Շատվորյանը Հայոց ցեղասպանության 100-ամյակին նվիրված միջոցառումների շրջանակում հանդես էր եկել Հայոց ցեղասպանության զոհերի հիշատակին նվիրված խաչքարերի տեղադրման նախաձեռնությամբ:
Հայոց ցեղասպանության 100-ամյակին նվիրված խաչքարեր են տեղադրվել Նիկոլաեւում, Պոլտավայում, Դնեպրոպետրովսկում, Կիրովոգրադում, Ուժգորոդում, Բերեժանիում, Խմելնիցկիում, Չեռնիգովում, Սլավուտիչում (Կիեւի մարզ) եւ Ռայկիում (Ժիտոմիրյան մարզ): Իսկ Խարկովում Հայոց ցեղասպանության զոհերի հուշահամալիր է բացվել: Այլ շրջաններում Հայոց ցեղասպանությանը նվիրված բանաձեւեր են ընդունվել: