ՆԱՏՕ–ին Վրաստանի հնարավոր անդամակցությունը ոչ մի կերպ չի անդրադառնա Թբիլիսիի եւ Երեւանի հարաբերությունների վրա։ Այս մասին սեպտեմբերի 12-ին՝ Երեւանում բացված «Առաջիկա մարտահրավերներ. ՆԱՏՕ-ն Ուելսից մինչեւ Վարշավա եւ անդին» թեմայով կոնֆերանսի մեկնարկից առաջ, ասել է Վրաստանի նախկին արտգործնախարար Մայա Փանջիկիձեն։
Անդրադառնալով NEWS.am–ի թղթակցի հարցին, թե կարելի է արդյոք մոտ ապագայում ակնկալել Վրաստանի անդամակցությունը ՆԱՏՕ–ին, Փանջիկիձեն պատասխանեց. «Ես լիահույս եմ, որ Վրաստանի անդամակցությունը ՆԱՏՕ–ին հնարավոր է մոտ ապագայում։ Վրաստանը անկախության օրվանից աշխատում է ՆԱՏՕ–ի հետ։ Մենք ինտեգրացիայի շատ գործիքներ ունենք, եւ դրանք շատ լավ են աշխատում։ 2008-ից մենք հույս ունենք, որ դա շուտով տեղի կունենա, եւ ՆԱՏՕ–ի գլխավոր քարտուղարի վերջին այցը Թբիլիսի ցույց է տալիս, թե ինչպիսի սերտ հարաբերություններ ունենք մենք դաշինքի հետ, եւ դա անպայման կհանգեցնի ՆԱՏՕ–ին Վրաստանի անդամակցությանը»։
Ինչ վերաբերում է հարցին, թե ինչպես դա կանդրադառնա Վրաստանի եւ ՀԱՊԿ անդամ Հայաստանի միջեւ հարաբերություններին, Փանջիկիձեն ասել է. «Դա ոչ մի կերպ չի անդրադառնա հայ–վրացական հարաբերություններին, քանի որ մենք շատ լավ, վաղեմի հարաբերություններ ունենք, եւ այն, թե որ բլոկի անդամ ենք մենք դառնալու, ոչ մի ազդեցություն չի ունենա։ Այդ պատճառով ես կարծում եմ, որ չնայած այն հանգամանքին, որ Վրաստանն ուզում է անդամակցել Եվրամիությանն ու ՆԱՏՕ–ին, իսկ Հայաստանը այլ պլաններ եւ հավակնություններ ունի, դա ոչ մի կերպ խոչընդոտ չի դառնա երկու երկրների միջեւ տնտեսական հարաբերությունների զարգացման համար»։