Սահմանադրական հանրաքվեի կեղծարարներն ընդամենը տուգանքով ազատվեցին: Այս մասին սեպտեմբերի 13-ին խորհրդարանում ասել է ՀԱԿ խմբակցության ղեկավար Լեւոն Զուրաբյանը՝ դիմելով գլխավոր դատախազի թեկնածու Արթուր Դավթյանին:
Զուրաբյանը հիշեցրեց, որ Գլխավոր դատախազության տվյալներով՝ 2015-ի դեկտեմբերի 6-ի հանրաքվեում խախտումների մասին 597 ահազանգ է ստացվել: 35 գործով դատական վճիռ է կայացվել 38 անձի դեմ: «Գործընթացը արագացված էր, սակայն Գլխավոր դատախազությունը չի պարզել, թե արդյոք գործ ունի կեղծումների կազմակերպված ցանցի հետ, թե ոչ: Իրավախախտն ուղղակի արագ տուգանվել է եւ ազատ արձակվել: Մենք դա հանցագործության կոծկում ենք համարում»,- ասել է նա: