Իրանի հետ առանց վիզայի ռեժիմը հայ եւ իրանցի տուրօպերատորներին ձեռքում հայտնված խաղաթուղթ է: Այս մասին NEWS.am-ին ասել է Էկոնոմիկայի նախարարության տուրիզմի վարչության պետ Մեխակ Ապրեսյանը:
Էկոնոմիկայի նախարարությունում արդեն քննարկվում է Հայաստանի եւ Իրանի տուրիստական ընկերությունների մասնակցությունը երկու երկրներում կազմակերպվող ցուցահանդեսներին: Պատրաստվում է նաեւ իրանցի լրագրողների ճանաչողական այցելություն Հայաստան: Քննարկվում են նաեւ Հայաստանում եւ Իրանում միասնական տուրիստական առաջարկի (մեկ ուղեգրով երկու երկրներ այցելելու) եւ այն համաշխարհային շուկայում ներկայացնելու եղանակները:
«Հույս ունենք այս ծրագրերն իրականացնել Հայաստանում Իրանի դեսպանատան օժանդակությամբ՝ Իրանի Մշակութային ժառանգության, արհեստների եւ տուրիզմի կազմակերպության հետ միասին»,- հավելել է Ապրեսյանը:
Հիշեցնենք, որ 2016-ի օգոստոսի 6-ից Հայաստանի եւ Իրանի միջեւ առանց վիզայի ռեժիմ է գործում: