Սեպտեմբերի 19-ին աշխատանքային այցով Նյու Յորքում գտնվող ՀՀ արտգործնախարարի պաշտոնակատար Էդվարդ Նալբանդյանը հանդիպեց Կանադայի արտգործնախարար Ստեֆան Դիոնի հետ եւ նրա հետ քննարկել ՄԱԿ-ի, ԵԱՀԿ եւ Ֆրանկոֆոնիայի շրջանակներում փոխգործակցության հարցեր:
ԱԳՆ-ից NEWS.am-ին հայտնում են, որ Էդվարդ Նալբանդյանը նշեց, որ ուրախ է հանդիպել Հայաստանի վաղեմի բարեկամ Ստեֆան Դիոնին՝ որպես Կանադայի արտաքին քաղաքական գերատեսչության ղեկավար, եւ շարունակել երկկողմ հարաբերությունների համակողմանի զարգացման շուրջ երկխոսությունը:
Նախարար Դիոնը շնորհավորեց Հայաստանի անկախության 25-ամյակի կապակցությամբ եւ նշեց, որ շարունակելու է Հայաստանի հետ փոխգործակցության համակողմանի խորացման ուղղությամբ ջանքերը։
Զրուցակիցները քննարկեցին հայ-կանադական օրակարգին վերաբերող բազմաթիվ հարցեր, անդրադարձան միջխորհրդարանական կապերին, իրավապայմանագրային դաշտի ընդլայնմանը, մուտքի արտոնագրային ռեժիմի դյուրացմանը։ Երկուստեք կարեւորվեց կանադահայ համայնքի ակտիվ դերակատարությունը հարաբերությունների խորացման գործում։
Հայաստանի եւ Կանադայի արտաքին քաղաքական գերատեսչությունների ղեկավարները քննարկեցին ՄԱԿ-ի, ԵԱՀԿ եւ Ֆրանկոֆոնիայի շրջանակներում փոխգործակցության հարցեր։
Էդվարդ Նալբանդյանը կանադացի գործընկերոջը ներկայացրեց այս տարվա ապրիլին Ադրբեջանի կողմից Լեռնային Ղարաբաղի դեմ սանձազերծված լայնածավալ ռազմական ագրեսիայի հետեւանքները, դրանց վերացմանն ուղղված՝ Վիեննայում եւ Սանկտ-Պետերբուրգում կայացած գագաթաժողովներին ձեռք բերված պայմանավորվածությունների կատարմանն ուղղված ջանքերը:
