Հայաստանի «Հանրապետական» կուսակցությունը գոհ է սեպտեմբերի 18-ի ՏԻՄ ընտրությունների արդյունքից: Այս մասին այսօր` սեպտեմբերի20-ին, լրագրողների հետ հանդիպմանն ասաց ՀՀԿ փոխնախագահ Արմեն Աշոտյանը:
«Ընտրությունները ցույց տվեցին, որ շարունակում ենք վայելել հասարակության վստահությունը, կուսակցությունը բավարարված է իր արձանագրած հաղթանակով: Մեր կողմից առաջադրված թեկնածուների ճնշող մեծամասնությունը ստացել է վստահության քվե եւ ընտրվել: ՀՀԿ-ի թեկնածուներից շուրջ 160 –ը ընտրվել կամ վերընտրվել է իրենց պաշտոնում: Մենք սատարելով անկուսակցական կադրերին` շեշտը դնում ենք տվյալ թեկնածուների գիտելիքների, վրա եւ այդ պատճառով ՀՀԿ-ն սատարաել է նաեւ մի շարք անկուսակցական թեկնածուների: Մենք ընդհանուր գոհ ենք նաեւ ընտրարշավից եւ արդյունքներից, որոշակի խնդիրներ թեկնածուների հետ կապված ունեցել ենք, բայց չմոռանանք, որ ընտրությունները հենց մրցակցություն են ենթադրում: Շուրջ 10 համայնքներում եղած լոկալ ընտրությունները չեն կարող հարցականի տակ դնել ՀՀԿ-ի վստահությունը»:
Արմեն Աշոտյանը նաեւ ողջունեց Նոր կյանքում «Քաղաքացիական պայմանագիր» կուսակցության թեկնածուի ընտրվելու փաստը` նշելով, որ սա ապացույց է, որ Հայաստանում հնարավոր է ընտրությունների միջոցով հասնել փոփոխությունների. «Մենք քաղաքական մրցակցությունը ողջունում ենք, լավ է, որ նոր կուսակցությունները կարողանում են մրցակցության մեջ մտնել: Սա ցույց է տալիս, որ ընտրությունների միջոցով կարելի է հասնել փոփոխությունների: Հույս ունենք, որ հոկտեմբերի երկուսին կայանալիք ընտրությունների արդյունքները նույնպես դրական կլինեն»:
Արմեն Աշոտյանը նշեց, որ ՏԻՄ ընտրություններում առաջին տեղը գրավել է «Հանրապետական» կուսակցությունը, իսկ երկրորդը տեղը` անկուսակցականները, որը նշանակում է, որ հասարակության շրջանում այլ քաղաքական ուժերի նկատմամբ վստահություն չկա:
«Առաջին տեղում ՀՀԿ-ն է: Երկրորդ տեղում անկուսակցական թեկնածուներն են, հուսով եմ, որ մի քանի տարի անց երկրորդ տեղում կլինեն քաղաքական ուժերը, ոչ թե անկուսակցականնները: Սա նշանակում է, որ ոչ բոլոր քաղաքական ուժերը տեղերում կարող են մրցունակ ծրագրեր ներկայացնել, վստահություն ունենալ ժողովրդի շրջանում»,-ասաց նա:
Հիշեցնենք, որ հանրապետությունում սեպտեմբերի 18-ին, ՏԻՄ ընտրություններ են անցկացվել Արագածոտնի, Արարատի, Արմավիրի, Սյունիքի եւ Տավուշի մարզերի 317 համայնքներում: Նշված համայնքներից 22-ում տեղի են ունեցել միայն համայնքի ղեկավարի ընտրություններ, 80 համայնքում` միայն ավագանու անդամի ընտրություններ, իսկ 215 համայնքում միաժամանակ անցկացվել են համայնքի ղեկավարի եւ ավագանու անդամի ընտրություններ:
