ՀՀ ԿԳ նախարար Լեւոն Մկրտչյանը Վրաստան այցի ժամանակ Վրաստանի կրթության եւ գիտության նախարար Ալեքսանդր Ջեջելավայի հետ քննարկել է Ջավախքի հայկական դպրոցներում առկա մի շարք խնդիրներ։ Այս մասին NEWS.am-ի հետ զրույցում ասաց նախարար Լեւոն Մկրտչյանը՝ նշելով, որ որոշում է ընդունվել այդ խնդիրները վերացնելու համար ձեւավորվել աշխատանքային խմբեր։
«Շատ կարեւոր հանդիպում եմ ունեցել նախարարի հետ, համագործակցության ամբողջ փաթեթի մեջ քննարկեցինք հայկական դպրոցների հիմնահարցը։ Դպրոցներում կան մեթոդական խնդիրներ, այսինքն՝ թարգմանված դասագրքեր կան, որոնք առանց մեզ են թարգմանվում եւ բավականին վատ որակի են, խնդիր է նաեւ, որ չկա մեր մասնակցությունը ուսուցիչների վերապատրաստման ժամանակ, բացի այդ ուսուցման բիլինգվատ մեթոդ կա, երբ նույն առարկան մի մասը վրացերեն են անցնում, մյուս մասը՝ հայերեն, այդ մեթոդը կփորձենք ուղղել։ Պայմանավորվեցինք բոլոր հիմնահարցերը, որոնք կողմերը ունեն, փորձենք լուծել։ Դրա համար էլ կձեւավորենք աշխատանքային խմբեր՝ երկու երկրների երեք աշխատանքային խումբ՝ հանրակրթության, միջին մասնագիտական եւ բարձրագույն կրթության եւ գիտության»,-ասաց նա։
Ավելի վաղ NEWS.am-ի հետ զրույցում «Վիրք» չգրանցված կուսակցության համանախագահ Դավիթ Ռստակյանը նշել էր, որ Ջավախքի հայկական դպրոցները հետզհետե վրացականացվում են։ Նրա խոսքով՝ հայկական դպրոցների խնդիրներից լրջագույնը հենց Ջավախքի հայկական դպրոցներում կրթության դասավանդման լեզուն վրացերենով իրականացնելու վերաբերյալ օրենքի ընդունումն է, նաեւ ուսուցիչների նախապատրաստման, տարբեր առարկաների դասավանդման մեթոդների, հայկական դասագրքերի ձեռքբերման, դպրոցների տարրական պայմանների ապահովման խնդիրներ։
Նշենք, որ Վրաստանի կրթության եւ գիտության նախարար Ալեքսանդր Ջեջելավայի հրավերով ՀՀ ԿԳ նախարար Լեւոն Մկրտչյանի գլխավորած պատվիրակությունը սեպտեմբերի 12-ից 14-ը մեկնել էր Վրաստանում: