Իրանի միջուկային ծրագրի հարցով համաձայնագրի իրականացման գործում ցանկացած խոչընդոտ կխափանի ԱՄՆ-ի հանդեպ վստահությունը: Irna-ի փոխանցմամբ՝ ՄԱԿ-ի Գլխավոր վեհաժողովում ունեցած ելույթում այս մասին հայտարարել է Իրանի նախագահ Հասան Ռոուհանին:
Նրա խոսքով՝ ԱՄՆ-ն լիովին գիտակցում է, որ Գործողությունների համատեղ համպարփակ պլանը բազմակողմ համաձայնագիր է, եւ ԱՄՆ-ի կողմից այն իրականացնելուց հրաժարվելը միջազգայնորեն հակաիրավական գործողություն կլինի եւ կհանդիպի միջազգային հանրության առարկությանը:
Ըստ Ռոուհանիի՝ ցավոք, նման գործողություններն աննախադեպ չեն: «Վերջին դեպքն իրանցի ժողովրդի՝ միլիարդավոր դոլարների ակտիվները բռնագրավելու մասին ԱՄՆ Գերագույն դատարանի որոշումն է: Այդ փորձը ցույց տվեց, որ սիոնիստական լոբբին կարողացավ շատ հեռուն գնալ եւ ԱՄՆ Կոնգրեսին ստիպեց աններելի օրենք ընդունել, որն ամերիկյան բարձրագույն դատական հաստատություններին ստիպում է խախտել միջազգային իրավունքի գերակա նորմերը»,- ամփոփել է Իրանի նախագահը:
