Տեխնոլոգիաներից անկախ` ազատ մամուլի հիմնարար սկզբունքները մնում են անփոփոխ: Այս մասին սեպտեմբերի 23-ին մեկնարկած «Թվապատում 2016» թվային միջավայրում ստեղծվող լրագրողական պատմություններին նվիրված երկօրյա կոնֆերանսի շրջանակում ասաց ԵԱՀԿ գրասենյակի ղեկավարի տեղակալ Բարբարա Դեյվիսը։
«Արագ զարգացող մեդիա տեխնոլոգիաները փոխել են գաղափարներ արտահայտելու մեր միջոցները, սակայն տեխնոլոգիաներից անկախ` դրանք, ներառելով հարգանք ժողովրդավարական սկզբունքների հանդեպ եւ մասնագիտական էթիկա, մնում են անփոփոխ: «Թվապատում»-ը մեզ բոլորիս միավորում է լրագրողական նոր ձեւաչափում:», – ասաց նա։
Արդեն երկրորդ տարին անցկացվող «Թվապատում» կոնֆերանսը հնարավորություն է տալիս լրագրողներին եւ մեդիադաշտի մյուս մասնագետներին հանդիպել եւ խոսել լրագրողական բովանդակության ստեղծման արդի փորձի, նոր ձեւաչափերի ու գործիքների, տեղական ու միջազգային դաշտի միտումների ու ձեռքբերումների մասին:
Արդեն ավանդական դարձող «Թվապատում» միջոցառումների շարքն անցկացվում է «Մեդիան քաղաքացիների տեղեկացված մասնակցության համար» ծրագրի շրջանակում, որն իրականացվում է ԱՄՆ Միջազգային զարգացման գործակալության միջոցով:
Մատենադարանի Մեծ դահլիճում տարբեր երկրներից ժամանած մասնագետների մասնակցությամբ կծավալվեն քննարկումներ եւ զրույցներ հետաքննական լրագրության, հակամարտությունների լուսաբանման, մեդիայի նոր գործիքների եւ միտումների թեմաների շուրջ:
Երկօրյա կոնֆերանսը կկայանա սեպտեմբերի 23-24-ին Մատենադարանում, որին կհաջորդի «Թվապատում 2016. պատմություններ փոփոխությունների մասին» լրագրողական մրցույթի մրցանակաբաշխության արարողությունը:
