Նոր վարչապետը պետք է կոռուպցիայի համար պատժի խիստ, թեկուզեւ ցուցադրաբար: Այս մասին լրագրողներին սեպտեմբերի 26-ին ասել է Հայաստանի գործատուների միության գործադիր տնօրեն Գագիկ Մակարյանը՝ մեկնաբանելով Կարեն Կարապետյանի նշանակումը վարչապետի պաշտոնում ու նոր Կառավարության աշխատանքի հեռանկարները:
Մակարյանի խոսքով, խնդիրն այն է, որ Հայաստանում յուրաքանչյուր նոր վարչապետ լիարժեք չի ստանձնում սահմանադրական լիազորությունները: Եվ երբ գալիս է ժամանակը՝ նախագահը կամ խորհրդարանը կարող են նրան մեղադրել անգործության մեջ ու դրան վարչապետն արդեն առարկել չի կարող: «Դրա համար էլ նոր վարչապետը պետք է պահանջի ինքնուրույնության այն աստիճանը, որը նրան տալիս է Սահմանադրությունը: Իսկ եթե չի ուզում ՝ ապա չարժե գործի անցնել»- ասել է ՀԿ ղեկավարը:
Գագիկ Մակարյանի խոսքով վարչապետը պետք է գործադրի բոլոր ջանքերը, որպեսզի արմատախիլ անի կոռուպցիան, այդ թվում միջին ու ստորին օղակներում: Նախարարական պաշտոններին նա կարող է նշանակել մարդկանց, որոնք մտադիր չեն ձեռքերն աղտոտել: «Բայց դատարաններում, զանազան պետական հաստատություններում, տեղական իշխանությունների մակարդակում կոռուպցիան դրանից ինքն իրեն չի վերանա, եթե այն չպատժվի»,- հավելել է նա:
