ՀՅԴ-ՀՀԿ հուշագրում նշված չեն պաշտոնների անուններ, նման պայմանավորվածություն չի եղել: Այս մասին Ազգային ժողովում այսօր՝ սեպտեմբերի 26-ինն ասել է ՀՀԿ խմբակցության ղեկավար Վահրամ Բաղդասարյանն՝ անդրադառնալով Արծվիկ Մինասյանի՝ էկոնոմիկայի նախարարի պաշտոնից ազատվելուն։
«Հուշագրում նշված չեն պաշտոնների անուններ, հուշագրում մենք որևէ նման պայմանավորվածություն չունեինք: Ունեինք պայմանավորվածություն քանակների հետ, որ երեք դաշնակցական մեր գործընկերները պետք է լինեն կառավարության կազմում, և մենք դա պահպանում ենք և կպահպանենք: Իսկ մնացածը, թե ով որտեղ կլինի, համբերեք, դուք տեղյակ կլինեք»,- ասաց Վահրամ Բաղդասարյանը:
Հարցին, թե Արծվիկ Մինասյանը չբավարարե՞ց ՀՀԿ-ի պահանջները, այդ պատճառո՞վ է հեռանում իր պաշտոնից, ասել է․
«Այսօր մենք ունենք նորանշանակ վարչապետ, ձևավորվում է նոր կառավարություն, նոր մոտեցումներ են, նոր գործիքներ, նպատակահարմարությունն այն է, թե ով որտեղ ավելի օգտակար ու պիտանի կլինի: Գնահատելով և ավելի առավելություն տալով Արծվիկ Մինասյանին այլ ոլորտում, հնարավոր է նա տեղափոխվի այլ պաշտոնի»։ ՀՀԿ խմբակցության ղեկավարը նշեց, որ նորանշանակ վարչապետը կատարում է այն գործողությունները, որոնք որդեգրել է ՀՀԿ-ն:
Ինչ վերաբերում է այն հարցին, որ Կարեն Կարապետյանը կառավարությունը ձեւավորում է իր ընկերներով, ասել է․«Մեր մեջ չկան թաղային, ընկերական հարաբերություններ, մեր մոտ կան թիմային հարաբերություններ: Եվ բոլորը մեր թիմի անդամներն են: Հայաստանը փոքր երկիր է, և հնարավոր է, որ բոլորը մեկը մեկի հետ ունենան հարաբերություններ»:
ՀՀԿ խմբակցության ղեկավարն ասել է, որ կուսակցություննեի դերակատարությունըխորհրդարանում կմեծանա 2017 թվականի ընտրություններից հետո։ Վահրամ Բաղդասարյանն անդրադարձել է նաև վերջին օրերին շրջանառվող տեղեկությանը, թե ՀՀԿ ԳՄ անդամ Գագիկ Բեգլարյանն իշխանություններից նեղացած է իր պաշտոնանկության համար և անգամ չմասնակցեց նախարարությունում նոր նախարարի ներկայացման գործընթացին և առաջիկայում ՀՀԿ ԳՄ անդամ էլ չի լինի: «Նման խնդիր չունենք, իմ տեղեկություններով՝ Գագիկ Բեգլարյանը Հայաստանում չի եղել»,- ասաց Բաղդասարյանը։