Իշխանությունները հնարավորություն են տվել, որ որտեղ ասես սուպերմարկետներ բացվեն: Իսկ հիմա մտահոգվել են խնդիրների մասին, բայց արդեն ուշ է,սուպերմարկետները ամենուրեք են: Այս մասին սեպտեմբերի 26-ին ԱԺ արտահերթ նիստի ժամանակ ասել է «Օրինաց երկիր» խմբակցության քարտուղար Մհեր Շահգելդյանը՝ ելույթ ունենալով «Տեղական տուրքերի ու վճարների մասին» օրենքում փոփոխությունների նախագծի քննարկման ժամանակ: Օրինագիծը նախատեսում է բարձրացնել խոշոր խանութներից գանձվող՝ եւ նվազեցնել փոքրերից գանձվող տուրքերը (տուրքերը հաշվարկվելու են ըստ դրանց զբաղեցրած մակերեսի):
ՕԵ խմբակցությունը արդեն առաջարկել էր նոր սուպերմարկետների ու հիպերմարկետների բացումը սահմանափակելու մասին օրինագիծ, որպեսզի դրանք չխանգարեն փոքր խանութներին: «Բայց իշխանությունները «մոռանում էին» մեր առաջարկի մասին ու միայն հիմա են հիշել, երբ ամբողջ կենտրոնը զբաղված է ու արդեն կանոնակարգելու բան չկա»- նշել է Շահգելդյանը:
