Փոքր բիզնեսը ապրանքի յուրաքանչյուր խմբաքանակ ներմուծելիս կազատվի 40-45 դոլարի ծախսից: Այս մասին սեպտեմբերի 27-ին ԱԺ-ում ասել է Էկոնոմիկայի նախարարի պաշտոնակատար Արծվիկ Մինասյանը, 2-րդ ընթերցմամբ ներկայացնելով «Մաքսային կարգավորման մասին» օրենքում փոփոխությունների նախագիծը:
Օրինագիծը մաքսային վճարներից ազատում է մինչեւ 200 եվրո արժողության ապրանքային խմբաքանակները: Մինասյանի խոսքով, այդ վճարները վերացնելու շնորհիվ բիզնեսը մաքսային ձեւակերպման ժամանակ կտնտեսի 6500 դրամ ու 10-15 հազար էլ՝ մաքսային բրոքերի ծառայությունների հաշվին: Արդյունքում տնտեսվում է 40-45 դոլար, ընդ որում ոչ միաժամանակյա , այլ յուրաքանչյուր ապրանքի ներմուծումից:
Նկատենք, որ փոքր բիզնեսի աջակցության համար այս միջոցառումը Հայաստանը ձեռնարկում է Եվրասիական միության մաքսային օրենսդրության համապատասխան: