Վրաստանի խորհրդարանի պատգամավորության թեկնածուները ուղիղ եթերով բանավեճի ժամանակ ծեծկռտուք են սարքել, հայտնում է «Sputnik Գրուզիա» պորտալը:
«Իբերիա» հեռուստաալիքի ծրագրին մասնակցել են իրար դեմ պայքարող քաղաքական ուժերի ներկայացուցիչները՝ Իրակլի Գլոնտին եւ Զազա Ագլաձեն: Գլոնտին Ագլաձեին եւ նրա կողմնակիցներին մեղադրել է, որ նրանք գործում են Ռուսաստանի շահերով առաջնորդվելով: Ի պատասխան Ագլաձեն ընդդիմախոսի վրա է նետել ջրով ապակե բաժակը, հակառակորդը նրան նույն պատասխանին է արժանացրել: Հաղորդավարուհին փորձել է քաղաքական գործիչներին բաժանել, սակայն նրանք ձեռնամարտի են բռնվել: Հաղորդման հեռարձակումը դադարեցվել է:
Նշվում է, որ Իրակլի Գլոնտին ներկայացնում է «Պաատա Բուրչուլաձե – Պետությունը ժողովրդի համար» արեւմտամետ ընտրական դաշինքը, որի մեջ մտնում են երկրի նախկին նախագահ Միխայիլ Սաակաշվիլիի կողմնակիցները: Զազա Ագլաձեն ներկայացնում է «Թոփաձե – Արդյունաբերողներ, մեր հայրենիք» դաշինքը, որը հանդես է գալիս Ռուսաստանի հետ հարաբերությունների կարգավորման օգտին՝ ԵՄ եւ ՆԱՏՕ Թբիլիսիի անդամակցությունից հրաժարվելու հաշվին:
