Կարմիր խաչի միջազգային կոմիտեի ներկայացուցիչները Լեռնային Ղարաբաղում այցելել են Ադրբեջանի դատապարտված քաղաքացիներ Դիլհամ Ասքերովին եւ Շահբազ Գուլիեւին: Նրանց այցելել են սեպտեմբերի 20-ին: Ի պատասխան NEWS.am-ի հարցի՝ այս մասին ասաց Լեռնային Ղարաբաղում ԿԽՄԿ առաքելության տեղեկատվական բաժնի աշխատակից Էթերի Մուսայելյանը:
«Սեպտեմբերի 20-ին Լեռնային Ղարաբաղում Կարմիր խաչի միջազգային կոմիտեն հերթական այցելությունն է կատարել ադրբեջանցի երկու դատապարտյալներին եւ նրանց հնարավորություն է ընձեռել հարազատների հետ ընտանեկան բնույթի նորություններ փոխանակելու»,- նշել է Էթերի Մուսայելյանը:
Հիշեցնենք, որ Ադրբեջանի քաղաքացի Դիլհամ Ասքերովը Լեռնային Ղարաբաղի դատարանի վճռով 2014 թվականի դեկտեմբերի 29-ին ցմահ ազատազրկման է դատապարտվել, իսկ Շահբազ Գուլիեւը՝ 22 տարի ժամկետով ազատազրկման: Վերաքննիչ եւ Վճռաբեկ դատարանները դատավճիռն անփոփոխ են թողել:
