Ինֆորմացիոն տեխնոլոգիաների ձեռնարկությունների միության (ԻՏՁՄ) «Նախաճաշ նախարարի հետ» ձեւաչափի շրջանակում տեղի է ունեցել ՀՀ տրանսպորտի եւ կապի նորանշանակ նախարար Վահան Մարտիրոսյանի եւ ԻՏՁՄ անդամ-կազմակերպությունների ղեկավարների հանդիպումը:
ԻՏՁՄ Հանրային կապերի բաժնից NEWS.am-ին հայտնում են, որ հանդիպմանը միության կողմից ներկայացվել է ՏՀՏ ոլորտում գործող ծրագրերն ու խնդիրները: Մասնավորապես կարեւորվել են կրթության, աշխատուժի եւ գործարար բնագավառի զարգացմանը նպաստող միջոցառումներն ու Հայաստանը արտերկրում ներկայացնելու հնարավորությունները:
ՀՀ տրանսպորտի եւ կապի նախարարի ու ԻՏՁՄ-ի կողմից երկուստեք կարեւորվել են ՏՏ ոլորտի եւ պետության համագործակցությունը՝ ի նպաստ երկրի տեխնոլոգիական ու մասնավորապես ռազմարդյունաբերական ոլորտի զարգացմանը:
Հավելենք, որ նախարարի հետ հանդիպմանը մասնակցել են ԻՏՁՄ վարչության անդամներ՝ Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, «Ucom» ընկերության գլխավոր տնօրեն Հայկ Եսայանը, «ՎՕԼՕ» ընկերության տնօրեն Արմեն Քոչարյանը, «ԼայմԹեք» ընկերության տնօրեն Գեւորգ Սաֆարյանը, «ՎԵԲ» ընկերության տնօրեն Ալբերտ Տոնեյանը, «Մոնիտիս» ընկերություն տնօրեն Րաֆֆի Քասարջյանը, ինչպես նաեւ ԻՏՁՄ գործադիր տնօրեն Կարեն Վարդանյանը եւ փոխտնօրեն Հայկ Չոբանյանը:
Հիշեցնենք, որ «Նախաճաշ նախարարի հետ» ձեւաչափը իրականացվում է շուրջ հինգ տարի: Այն ԻՏՁՄ անդամներին հնարավորություն է տալիս ազատ մթնոլորտում ՀՀ նախարարների հետ քննարկել կարեւոր խնդիրներ: Հանդիպումների ընթացքում ի թիվս այլ հարցերի, վեր են հանվում ոլորտի շահերի պաշտպանության հիմնական ուղղությունները, այդ թվում՝ պետության եւ մասնավոր հատվածի համագործակցությանը, տեխնոլոգիական կրթության ու աշխատուժի զարգացմանը վերաբերող հարցեր: