Հայաստանն ու Ավստրիան ագրարային ոլորտում ունեն մի շարք ընդհանրություններ եւ այս առումով հատկապես կարեւոր է փորձի փոխանակումը: Այս մասին, այսօր՝ սեպտեմբերի 28-ին, ՀՀ գյուղատնտեսության նախարար Իգնատի Առաքելյանի հետ հանդիպման ժամանակ նշել է Ավստրիայի զարգացման գործակալության գործադիր տնօրեն Մարտին Լեդոլթերը:
Գյուղնախից NEWS.am-ին հայտնում են, որ հանդիպման նպատակն էր քննարկել Հայաստանի գյուղատնտեսության բնագավառում իրականացվող ծրագրերն ու նախանշել հետագա համագործակցության հեռանկարները:
«Ավստրիայի զարգացման գործակալությունը մեծ աջակցություն է ցուցաբերում Հայաստանում գյուղատնտեսության բնագավառի զարգացմանը, հատկապես մեծ հաջողություններ են գրանցվել օրգանական գյուղատնտեսության ոլորտում: Հուսով եմ` այսուհետ եւս մեր համագործակցությունը կկրի շարունակական բնույթ, իսկ համատեղ ծրագրերի շրջանակն ավելի կընդլայնվի», - ողջունելով հյուրերին` նշել է նախարար Իգնատի Առաքելյանը:
Շնորհավորելով նախարարին նշանակման կապակցությամբ` Մարտին Լեդոլթերն ընդգծել է, որ Հայաստանն ու Ավստրիան ագրարային ոլորտում ունեն մի շարք ընդհանրություններ եւ այս առումով հատկապես կարեւոր է փորձի փոխանակումը: Պարոն Լեդոլթերը հրավիրել է նախարարին այցելել Ավստրիա` երկրի գյուղատնտեսության ոլորտին տեղում ծանոթանալու նպատակով:
Կողմերը նշել են, որ սկսած 2011 թվականից ՀՀ գյուղատնտեսության նախարարության եւ Ավստրիայի զարգացման գործակալության միջեւ ծավալված համագործակցության շրջանակներում իրականացվել են գյուղատնտեսության զարգացմանը նպաստող մի շարք նախաձեռնություններ, մասնավորապես` Ավստրիայի զարգացման գործակալության կողմից համաֆինանսավորվող «Համատարած գյուղատնտնտեսական հաշվառում», «Օրգանական գյուղատնտեսության աջակցության նախաձեռնություն» եւ «Եվրոպական հարեւանության գյուղատնտեսության եւ գյուղական համայնքների զարգացման» (ENPARD) ծրագրերը:
Քննարկվել է նաեւ Ավստրիայի կողմից գյուղատնտեսական կենդանիների հաշվառման եւ համարակալման ծրագրի ֆինանսավորման հնարավորության հարցը:
Հանդիպման ավարտին ՀՀ գյուղատնտեսության նախարար Իգնատի Առաքելյանը Մարտին Լեդոլթերին է հանձնել Հայաստանի Հանրապետության վարչապետի հուշամեդալը` Ավստրիայի զարգացման գործակալության աջակցությամբ ՀՀ գյուղատնտեսության բնագավառում իրականացված եւ իրականացվող ծրագրերում ունեցած նշանակալի ավանդի համար:
