Հայաստանում տնտեսական դժվարությունների պատճառով խոշոր հարկատուների հարկային վճարումները պակասել են: Այս մասին սեպտեմբերի 28-ին ԱԺ-ում լրագրողներին ասել է ՊԵԿ ղեկավարի տեղակալ Վախթանգ Միրումյանը:
Առաջին խնդրահարույց ոլորտը լեռնահանքային արդյունաբերությունն է, որտեղ մետաղի միջազգային գները շարունակում են ցածր մնալ:
Երկրորդը ֆինանսաբանկային սեկտորն է, որտեղ ԱԱՀ չկա, եւ հիմնական եկամուտները շահութահարկից են:
Երրորդ ոլորտը հեռահաղորդակցման ընկերություններն են, որտեղ նկատելի պակասել է ձայնային ծառայությունների սպառումը:
Չորրորդ ոլորտը ալկոհոլային ըմպելիքներինն է, որոնք գնալով ավելի դժվար են իրացվում Ռուսաստանում:
«520 ձեռնարկություններից 181-ը 2016-ի հունվար-օգոստոս ժամանակահատվածում 47 մլրդ դրամ պակաս հարկ է վճարել: Դա շատ էական է, եթե հաշվի ենք առնում, որ հարկային մուտքերի 54 տոկոսը տալիս են հենց այդ ձեռնարկությունները»,- ասել է նա:
