Վրաստանի ԱԳՆ-ում սեպտեմբերի 28-ին, տեղի են ունեցել երկկողմ քաղաքական խորհրդակցություններ Հայաստանի եւ Վրաստանի արտաքին քաղաքական գերատեսչությունների միջեւ: Հայկական պատվիրակությունը գլխավորում էր ՀՀ ԱԳ նախարարի տեղակալ Շավարշ Քոչարյանը, իսկ վրացականը՝ Վրաստանի ԱԳ նախարարի տեղակալ Գիգի Գիգիաձեն:
ԱԳՆ-ից NEWS.am-ին հայտնում են, որ քաղաքական խորհրդակցությունների ընթացքում կողմերը քննարկել են երկկողմ քաղաքական հարաբերությունների եւ երկու երկրների միջեւ առեւտրատնտեսական կապերի ներկա վիճակին եւ հետագա զարգացմանն առնչվող հարցերի լայն շրջանակ: Խորհրդակցությունների օրակարգում առանձնահատուկ ուշադրություն էր դարձվել տրանսպորտի, էներգետիկայի, մշակույթի եւ կրթության ոլորտներում համագործակցության խորացմանը: Կողմերն ընդգծեցին առկա իրավական դաշտի ցուցակագրման անհրաժեշտությունը:
Զրուցակիցներն անդրադարձել են նաեւ միջազգային կազմակերպությունների շրջանակներում համագործակցության ակտիվացմանն առնչվող հարցերի, մտքեր փոխանակել միջազգային եւ տարածաշրջանային բազմաթիվ խնդիրների շուրջ: