Բրիտանական Shazam Entertainment Ltd. ընկերությունը գոյության 17 տարիների ընթացքում առաջին անգամ օպերացիոն շահույթ է ստացել: Այս մասին գրում է ՌԲԿ-ն՝ վկայակոչելով The Wall Street Journal-ը: Շահույթի հստակ չափը, սակայն, չի նշվում:

Shazam-ը բջջային հավելված է, որը ճանաչում է երաժշտական կոմպոզիցիաներն ու պատկերները: Այն ավելի քան 120 մլն օգտատեր ունի: Նշվում է, սակայն, որ ընկերությանը շահույթ է բերել ոչ թե երաժշտությունը, այլ գովազդի մեծ ծավալը:

Ըստ WSJ-ի՝ գովազդատուները Shazam-ին վճարում են իրենց մարքեթինգային արշավներում ձայնը եւ պատկերը ճանաչող տեխնոլոգիաներն օգտագործելու համար:

Shazam-ը 1999 թվականին Մեծ Բրիտանիայում հիմնադրել է Քրիս Բարթոնը: 2014-ի հունվարին ընկերությունում ներդրումների ութերորդ փուլն է կատարվել, ինչից հետո այն 1 մլրդ դոլար է գնահատվել: