Մրցակցային մարմինները չեն կարող միայնակ հասնել ոլորտում առկա խնդիրների ամբողջական լուծմանը, քանի որ շատ դեպքերում դրանք գտնվում են այլ կառույցների կարգավորման դաշտում: Այս մասին Մոսկվայում կայացած ՌԴ հակամենաշնորհային ծառայության կոլեգիայի նիստի ժամանակ նշել է ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
Նրա խոսքով, տնտեսական մրցակցության խնդիրների կարգավորմանն ու դաշտի առավել բարելավմանը հնարավոր է հասնել միայն մրցակցային մարմինների եւ այլ պետական կառույցների արդյունավետ համագործակցության շնորհիվ. «Մրցակցային մարմինները չեն կարող միայնակ հասնել ոլորտում առկա խնդիրների ամբողջական լուծմանը, քանի որ շատ դեպքերում դրանք գտնվում են այլ կառույցների կարգավորման դաշտում»:
Նրա խոսքով, շատ դեպքերում ի հայտ եկած խնդիրների միայն հետեւանքներն են գտնվում մրցակցային մարմինների կարգավորման դաշտում, իսկ պատճառները՝ այլ պետական կառույցների վերահսկողության եւ լիազորությունների ոլորտում են: «Եթե անգամ ՀՀ մրցակցային հանձնաժողովին հասցեագրված դիմում-բողոքի կամ սեփական նախաձեռնությամբ բացահայտված խնդրի կարգավորումը դուրս է մեր իրավասությունների շրջանակից, ապա մենք այն հասցեագրում ենք համապատասխան պետական կառույցին եւ հետագայում եւս հետեւողական ենք դրանց լուծման հարցում»,-նշել է ՏՄՊՊՀ նախագահը:
Տեղեկացնենք, որ նիստը վարել է ՌԴ առաջին փոխվարչապետ Իգոր Շուվալովը: