Խոսել այն մասին, որ Ուկրաինայի հարցով «նորմանդական ձեւաչափի» շրջանակում երկխոսությունն ընդհատվել է՝ կոռեկտ չէ. Այն ընթանում է, այդ թվում՝ փորձագետների մակարդակով: «ՌԻԱ Նովոստի»-ի փոխանցմամբ՝ այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը:
«Դա չի կարելի բացառել: Աշխատանք է ընթանում փորձագետների մակարդակով: Երբ պատրաստ կլինեն անհրաժեշտ պայմանները, վերջնական որոշում կընդունվի, ինչի մասին մենք կտեղեկացնենք»,- լրագրողներին ասել է Պեսկովը՝ պատասխանելով առաջիկայում «նորմանդական քառյակի» հանդիպում անցկացնելու հնարավորության մասին հարցին:
Նա նշել է, որ Պուտինն ու Մերկելը վերջին համաձայնությունների կապակցությամբ գոհունակություն են հայտնել եւ ընդգծել են, որ «աշխատանք կատարվում է, այդուհանդերձ բարձր մակարդակով հանդիպման համար, իհարկե, դեռեւս պետք է լրացուցիչ տնային աշխատանք կատարել»:
«Երկոսությունը տարբեր ուղղություններով է ընթանում: Այսինքն՝ խոսել այն մասին, որ երկխոսությունն ընդհատվել է՝ կոռեկտ չէ: Հակառակը՝ այն տարբեր ուղղություններով եւ տարբեր մակարդաներով է ընթանում»,- ասել է Պեսկովը:
