Գերագույն Ռադայի պատգամավոր Սերգեյ Լեշչենկոն հայտնել է, որ Ուկրաինայում պետք է օրինականացվի մարմնավաճառությունը: Այդ մասին նա հայտնել է Reed պորտալին տված հարցազրույցում:
«Օրինականացումն աշխատունակ բնակչությանը սոցիալական պաշտպանության երաշխիքներ կտա եւ փողը բյուջե կուղարկի: Շատ երկրներ դա օգտագործում են նաեւ որպես զբոսաշրջային խայծ: Ուկրաինացիները չպետք է այդ պետություններից հիմար լինեն», — հայտնել է Լեշչենկոն:
Նա հավելել է, որ մարմնավաճառության համար հետապնդումը մարդու բնույթի դեմ պայքար է համարում:
Անցյալ տարվա հոկտեմբերին Գերագույն Ռադայի պատգամավոր Անտոն Գերաշչենկոն առաջարկել է համաժողովրդական հանրաքվեի դնել Ուկրաինայում մարմնավաճառության օրինականացման հարցը: Նա հիշեցրել է, որ այժմ Ուկրաինայում կավատությունը հետապնդվում է քրեական կարգով, իսկ սեռական ծառայություններ տրամադրելու համար վարչական տուգանք է գանձվում:
Նույն թվի հոկտեմբերի վերջին Ռադայում օրենքի նախագիծ է գրանցվել «Մարմնավաճառության եւ սեռական բնույթի հաստատությունների գործունեությունը կարգավորելու մասին»: Նախաձեռնության հեղինակի` պատգամավոր Անդրեյ Նեմիրովսկու կարծիքով, «մարմնավաճառությունը քաղաքակիրթ պետական կարգավորում» է պահանջում, ինչպես նաեւ «մարմնավաճառների համար ամրագրված սոցիալական երաշխիքներ»:
Նույն թվի մայիսին նմանատիպ հայտարարություններով հանդես են եկել կիեւյան միլիցիայի ղեկավար Ալեքսանդր Տերեշչուկը եւ Ռադայի պատգամավոր Միխայիլ Գավրիլյուկը: Այդ գաղափարը նրանք հիմնավորել են երկրի բնակչությանը վեներական հիվանդություններից ապահովագրելու անհրաժեշտությամբ: