Հայաստանը հաջորդ տարի սկսելու է «հայկական պանիր» ծրագիրը, որի շնորհիվ հայկական այդ նոր բրենդը կսկսի նվաճել աշխարհը։ Այդ մասին այսօր` հոկտեմբերի 18-ին հայտարարեց վարչապետ Տիգրան Սարգսյանը։ Սպասվում է, մասնավորապես, որ հայկական պանրի արտահանումը կտրուկ կավելանա նախ դեպի Ռուսաստան, այնուհետեւ՝ դեպի այլ շուկաներ։
«Հայկական պանիր» ծրագիրն իրականացվում է պետություն-մասնավոր հատված համագործակցության շրջանակներում եւ մաս է կազմում արտահանման խթանման միջոցառումների։
Արտահանման խթանման տեսանկյունից, էական նշանակություն կունենա նաեւ «Զվարթնոց» օդանավակայանում ազատ տնտեսական գոտու ստեղծումը, որը հնարավորություն կտա հայկական գյուղատնտեսական մթերքները արտահանել եվրոպական եւ ամերիկյան շուկաներ։ Ազատ տնտեսական գոտում կիրականացվի գյուղմթերքների պահեստավորում, փաթեթավորում, արտադրություն։ Տ. Սարգսյանի տեղեկացմամբ՝ փետրվարից կսկսի գործել սառնարանային տնտեսությունը, տարվա ընթացքում կհստակեցվեն նաեւ լոգիստիկ սխեմաները։
Հայաստանից արտահանման կարեւոր ուղղություներից է դառնալու ձկնամթերքը։ Այս տարի Հայաստանի ձկնաբուծական տնտեսություններն արտահանել են արդեն մոտ 80 տոննա ձկնեղեն, սպասվում է, որ հաջորդ տարի դրա ծավալը կամ կկրկնապատկվի, կամ կեռապատկվի։
Պետություն-մասնավոր հատված համագործակցության մյուս կարեւոր ուղղությունը, ըստ Տ. Սարգսյանի՝ զբոսաշրջության զարգացումն է։ Վարչապետն ասաց, որ «Մաքքենզի» ընկերության հետ զբոսաշրջության զարգացման բիզնես-ծրագրեր են կազմել, որը հետեւողականորեն իրականացնում են։ Դրա օրինակներից մեկն է Տաթեւի ծրագիրը, հաջորդը՝ Ջերմուկի եւ Դիլիջանի զարգացման ծրագրերն են։ Ներկայումս մշակման փուլում է Սեւանում նոր զբոսաշրջային համալիրի կառուցման ծրագիրը, որի իրականացման համար կհրավիրվեն լուրջ ներդրողներ։
