12-րդ ամենամյա DigiTec ցուցահանդեսի ընթացքում տեղի է ունեցել «Բաց խաղ» համակարգչային եւ բջջային խաղերի առաջնության 3-րդ փուլը: Այս մասին NEWS.am-ի թղթակցին հայտնեցին Ինֆորմացիոն տեխնոլոգիաների ձեռնարկությունների միության (ԻՏՁՄ) մամուլի ծառայությունից։
Մրցույթի շրջանակներում 20 համակարգչային եւ բջջային խաղերի հեղինակներ ներկայացրել են իրենց նախագծերը: Պրոֆեսիոնալ ժյուրիի կազմում ընդգրկված են եղել Ucom, PicArt, X-Tech, Frismos, ViViFi, Underwater Apps եւ այլ ընկերությունների ներկայացուըցիչներ։
Հոկտեմբերի վերջին կայանալիք «Բաց խաղ 2016» ցուցահանդեսի ժամանակ կհայտարարվեն լավագույն խաղերի հեղինակների անունները:
Այս տարի մասնակիցներին խաղերը ծրագրավորելիս հնարավորություն է տրվել օգտագործել նաեւ Աղվես (Scratch) լեզուն: Այս ծրագրին տիրապետում են ՀՀ ավելի քան 2000 դպրոցականներ՝ հաջողությամբ օգտագործելով այն ռոբոտներ ծրագրավորելիս:
Այս տարվա մրցանակային ֆոնդը կազմում է 2 մլն դրամ: Կլինեն նաեւ խրախուսական այլ մրցանակներ, այդ թվում՝ տեխնիկա։
«Բաց խաղ» առաջնությունն 2011 թվականից իրականացվել է Ինֆորմացիոն տեխնոլոգիաների ձեռնարկությունների միության (ԻՏՁՄ) եւ «Յուքոմ» ընկերության համատեղ ջանքերով: Արդեն երկու տարի է՝ ինչ մրցույթի գործընկեր է հանդիսանում Huawei ընկերությունը:
«Բաց խաղ» առաջնությունը նպատակ ունի ստեղծել Հայաստանում խաղային ինդուստրիայի զարգացման համար հարմար միջավայր, խրախուսել տեխնոլոգիական ոլորտում ներուժ ունեցող երիտասարդներին: