Հյուսիսային Օսիայում ավտոբուսի վթարի հետեւանքով 9 տուժած դեռեւս հիվանդանոցում են, 3-ի վիճակը ծանր է: ՌԻԱ Նովոստիի փոխանցմամբ՝ այս մասին լրագրողներին հայտնել է ՌԴ առողջապահության նախարարության հանրային առողջության եւ հաղորդակցության բաժնի տնօրեն Օլեգ Սալագայը:
Ավելի վաղ ԱԻՆ-ը հաղորդել էր, որ ուրբաթ առավոտյան Մոսկվա-Երեւան երթուղու ավտոբուսի եւ բեռնատարի բախման հետեւանքով 5 մարդ է զոհվել, 27 վիրավոր հոսպիտալացվել է, որոնցից 4-ը՝ 10-15 տարեկան երեխաներ: Բեսլանի մշակույթի տանը ժամանակավոր տեղակայման կետ է բացվել, որտեղ առայժմ 14 մարդ կմնա: Նախնական տվյալներով՝ վթարի հետեւանքով տուժածների մեծ մասը Հայաստանի բնակիչներ են:
«Ներկայում ստացիոնար բուժում է ստանում 9 տուժած, որոնցից 3-ի վիճակը բժիշկները ծանր են գնահատում: Ամբողջական ծավալով անհրաժեշտ բուժօգնություն է ցուցաբերվում»,- ասել է Սալագայը:
Նա նաեւ նշել է, որ ՌԴ առողջապահության նախարար Վերոնիկա Սկվորցովան հանձնարարել է վերահսկել տուժածներին բուժօգություն ցուցաբերելու հետ կապված բոլոր հարցերը: