Մոսկվա-Երեւան ավտոբուսի վթարից տուժած եւս 3 քաղաքացի այսօր՝ հոկտեմբերի 15-ին, կեսօրից հետո դիմել են «Սուրբ Գրիգոր Լուսավորիչ» բժշկական կենտրոն:
ՀՀ առողջապահության նախարարությունից NEWS.am-ին հայտնում են, որ նրանցից 47-ամյա տղամարդը Լոռու մարզից է, 40 եւ 36-ամյա եղբայրները՝ Տավուշի մարզից։
«Սուրբ Գրիգոր Լուսավորիչ» բժշկական կենտրոնի վերակենդանացման բաժանմունքի վարիչ Սամվել Կարապետյանը NEWS.am-ի հետ զրույցում հայտնեց, որ հոկտեմբերի 14-ին հիվանդանոց էր տեղափոխվել 11 քաղաքացի, որոնք բուժօգնություն ստանալուց հետո դուրս էին գրվել: Ընդամենը մեկ քաղաքացի էր մնացել, որն էլ առավոտյան դուրս էր գրվել: Սամվել Կարապետյանը նշեց, որ այսօր իրենց դիմած տուժածները եւս լուրջ վնասվածքներ չունեին: «Իրենք այսօր են դիմել մեզ, հետազոտվել են, նախնական տվյալներով` լուրջ պաթոլոգիաներ չկան: Ոսկրային կոտրվածքներ ինչպես երեկ, այնպես էլ այսօր չենք հայտնաբերել որեւէ մեկի մոտ: Բոլորի մոտ հիմնականում քերծվածքներ, սալջարդեր են եղել: Ռուսաստանի դաշնությունում բավականին ճիշտ օգնություն է ցուցաբերվել տուժածներին»,-ասաց Սամվել Կարապետյանը:
Ավելի վաղ NEWS.am-ը հայտնել էր, որ հոկտեմբերի 14-ի առավոտյան ժամը 04.30-ի սահմանում, ՌԴ տարածքում` Վլադիկավկազ-Բեսլան շրջանցիկ ավտոճանապարհին Մոսկվա-Երեւան երթուղու «Մերսեդես Բենց-0404-15R» մակնիշի 50 AA 515 համարանիշի ավտոբուսը բախվել է «Սկանիա» բեռնատարին: Ավտովթարից տուժել է 27 մարդ, մահացել է 5-ը, այդ թվում վարորդը: Մահացածներից 2-ը ՀՀ քաղաքացիներ են, 3-ը՝ ՌԴ-ի: Տուժածների թվում 4-ը երեխաներ են. նրանցից մեկի վիճակը ծանր է:
Ավտոբուսի այն ուղեւորները, որոնց կարելի է տեղափոխել, Ռուսաստանի ԱԻՆ-ի օդանավով նախօրեին տեղափոխվել են Երեւան: Երեւան է տեղափոխվել նաեւ ավտովթարից զոհված վարորդը:
