ՏԻՄ ընտրությունների ժամանակ ընտրողներին փող են բաժանել։ Ընդ որում նաեւ այն կուսակցությունները, որոնք ընդդիմություն են «աշխատում»։ Այս մասին հոկտեմբերի 17-ին ԱԺ-ում ասել է ՀԱԿ խմբակցության քարտուղար Արամ Մանուկյանը Ընտրական օրենսգրքում փոփոխությունների նախագծի քննարկման ժամանակ։
«Իրենց կառավարման ձեւով իշխանությունները երկիրը հասցրել են նրան, որ շատերը պարզապես ի վիճակի չեն հրաժարվել այդ գումարներից։ Այդ նույն Վանաձորում ու Գյումրիում ես տեսել եմ ընտանիքներ, որոնք 28 տարի վագոն-տնակներում են ապրում։ Ոմանք տարրական կոմունալ հարմարություններ էլ չունեն։ Եվ ոմանք 10-12 երեխա ունեն։
Այդ մարդկանց եւ ոչ միայն նրանց իշխանությունները ամեն կերպ ներշնչում են, որ կստուգեն, թե ում են նրանք տալիս իրենց ձայնը։ Եվ մարդիկ տեղի են տալիս այդ ներշնչանքին։ Այդ դեպքում արժե՞ արդյոք զարմանալ, որ տեղի են տվել նաեւ Վանաձորի Ավագանու ընդդիմադիր անդամները, որոնք քվեարկել են իշխանության օգտին։
Ակնհայտ է նաեւ մեկ ուրիշ բան՝ այդ կուսակցությունները, որոնք ընդդիմություն են աշխատում, փոշիացնում են բողոքող ընտրազանգվածը։ Դա ակնհայտ է»,- հայտնել է Մանուկյանը։
