Արցախի դիրքերից մեկում հոկտեմբերի 7-ին հակառակորդի կողմից արձակված կրակոցից հրազենային վիրավորում ստացած զինծառայող Հայկ Համբարձումյանը շարունակում է մնալ Վերակենդանացման բաժանմունքում: Այս մասին NEWS.am-ին հայտնեցին Երեւանի ՀՀ ՊՆ Կենտրոնական զինվորական հոսպիտալից՝ նշելով, որ զինծառայողի վիճակը շարունակում է մնալ կայուն ծանր: Հոսպիտալից տեղեկացրին, որ Հայկին հոսպիտալից դուրս գրելու մասին դեռ շատ վաղ է խոսել:
Հայկ Համբարձումյանը կրծքավանդակի շրջանում է վիրավորում ստացել, լյարդի վնասվածք ունի:
Նշենք, որ վիրավոր զինծառայողին Ստեփանակերտի հոսպիտալից ուղղաթիռով Երեւան էին տեղափոխել:
Հայկը Երեւանից է, ունի իրենից մեծ քույր: Զինվորի մայրը մահացած է, Հայկն ապրում է հոր եւ քրոջ հետ:
Ավելի վաղ տեղեկացրել էինք, որ հոկտեմբերի 7-ին` ժամը 08:30-ի սահմանում, ՊԲ հարավային ուղղությամբ տեղակայված զորամասերից մեկի պահպանության տեղամասում հակառակորդի կողմից արձակված կրակոցից հրազենային վիրավորում է ստացել զինծառայող, 20-ամյա Հայկ Լեւոնի Համբարձումյանը:
ԼՂՀ ՊԲ-ից NEWS.am-ին հայտնում են, որ դեպքի մանրամասները պարզելու համար կատարվում է քննություն:
