Հայաստանում կարելի է արտադրել տեղական օրգանական պարարտանյութեր, որոնք ներմուծվողից շատ ավելի էժան կլինեն։ Այս մասին NEWS.am-ի թղթակցին հայտնել է Green Pharm ընկերության հիմնադիր Հրաչ Հակոբյանը, որը մասնակցում էր Երեւանում «Արմպրոդէքսպո» ցուցահանդեսին։ Ընկերությունը արտադրում է սեփական պարարտանյութեր ու արդեն դիմել է դրանք որպես օրգանիկ արտադրանք հավաստագրելու համար։
«Գյուղացիներից գնում ենք խոտ, գոմաղբ, ջերմային մշակման ենք ենթարկում, չորացնում, խմորման ենթարկում ու պաստերիզացնում։ Քիմիա դրանցում գործնականում չկա»,- նշեց Հակոբյանը։ ԸՆկերությունը արդեն ստացել է համապատասխանության հավաստագիր եւ «Ստանդարտ Դիալոգից» եւ Պետստանդարտից, իսկ տեխնիկական փորձաքննության համար դիմել է ԳՆ բանջարեղենաբոստանային ու տեխնիկական կուլտուրաների գիտական կենտրոն։ «Իհարկե օրգանական արտադրանքը էժան չի լինում։ Դրանից պատրաստված պարարտանյութը՝ նույնպես։ Բայց տեղական անալոգները, ինչպես արդեն ասացի, մի քանի անգամ էժան են ներմուծվողից։ Եվ մեզ հիմա ավելի հաճախ են դիմում՝ թե գյուղացիները, թե քաղաքացիները՝ իրենց տնամերձ հողատարածքների համար»,- հավելեց ձեռներեցը։
Ինչպես նշեց Հրաչ Հակոբյանը՝ պարարտանյութը ոչ միայն բարձրացնում է բերքատվությունը, այլեւ հողաբարելավման միջոց է, ճնշում է վնասակար սնկային միկրոօրգանիզմները ու օգնում բույսերին յուրացնել քիմիական պարարտանյութերի մնացորդները (որոնք խնդրահարույց են Արարատյան դաշտավայրում-խմբ)։