Amnesty International միջազգային իրավապաշտպան կազմակերպությունը կազմել է օգտատերերի նամակագրությանը չթույլատրված հասանելիությունից պաշտպանվածության վերաբերյալ վարկանշային աղյուսակ: Աղյուսակում ընդգրկվել են 11 ընկերությունների 16 ամենահայտնի մեսինջերները, գրում է РБК-ն:
Աղյուսակը գլխավորում են Facebook Messenger եւ WhatsApp (երկու ընկերություններն էլ պատկանում են Facebook-ին), որոնք ստացել են 73 բալ 100-ից: Հաջորդ տեղերը զբաղեցնում են Apple-ի iMessage եւ FaceTime-ը: Ռեյտինգի երրորդ հորիզոնականը զբաղեցնում է Telegram մեսինջերը 67 բալով:
Viber, Skype, Snapchat Blackberry Messenger-ը հավաքել են 50 բալից պակաս: Ռեյտինգում ամենացածր բալերը հավաքել են չինական QQ եւ WeChat մեսինջերները:
Ռեյտինգի հիմնական չափանիշը կոդավորման ծառայության առկայությունն է եղել՝ «անձնական կյանքի անձեռնմխելիությունը եւ կարծիքների ազատ արտահայտումը օնլայն սպառնալիքներից պաշտպանելու համար»:
Տասնվեց մեսինջերներից միայն վեցի մոտ են եղել այսպես կոչված end-to-end կոդավորման ծառայություն: Այդ մեսինջերներն են WhatsApp, Apple-ի iMessage եւ FaceTime , Duo-ն՝ Google-ից, Line եւ Viber-ը: Առանձին միավորներ են նաեւ տրվել օգտատերերի տվյալները իշխանություններին բացահայտվելուց պաշտպանվածության համար: Ամենաբարձր բալերը ստացել են Facebook Messenger, WhatsApp, Snapchat, Skype, հարավկորեական Kakao Talk-ը, Google-ի մեսինջերները: Վարկանշային աղյուսակի աութսայդերները չինական QQ եւ WeChat-ն են դարձել, որոնցից ընդհանուր առմամբ օգտվում է 1,55 մլրդ օգտատեր: