Պետական ապարատում կրճատումները գործի կեսն են, հարկավոր է բարձրացնել դրա աշխատանքի արդյունավետությունը: Այս մասին հոկտեմբերի 24-ին լրագրողների հետ հանդիպմանը հայտարարեց Հայաստանում Ամերիկյան առեւտրի պալատի (AmCham) նախագահ Տիգրան Ջրբաշյանը՝ մեկնաբանելով նոր վարչապետ Կարեն Կարապետյանի՝ պետական ապարատի ծախսերը կտրուկ կրճատելու նախաձեռնությունը:
«Հասկանալի է, թե ինչու են որոշել կրճատել ծախսերը. հարկման նոր սխեման նոր եկամուտներ չի խոստանում, իսկ պետական պարտքի սպասարկման ծախսերն աճում են: Բայց պարզապես կրճատելը լավագույն միջոցը չէ: Միաժամանակ, հարկավոր է բարձրացնել աշխատանքի արդյունավետությունը, որպեսզի ավելի փոքր ռեսուրսով հնարավոր կլինի նույն չափով կամ նույնիսկ ավելի պետական ծառայություններ մատուցել»,- ընդգծել է Ջրբաշյանը:
