ՀՀ գլխավոր դատախազի ցուցումով Շամշադինի դիրքերից մեկում մահացած հայտնաբերված Արսեն Մխիթարյանի մահվան գործով կատարվող նախաքննության վարույթը տեղափոխվել է ՀՀ քննչական կոմիտեի զինվորական քնչական գլխավոր վարչության հատկապես կարեւորագույն գործերի քննության վարչություն: Այս մասին այսօր՝ հոկտեմբերի 25-ին, NEWS.am-ը տեղեկացավ Արսեն Մխիթարյանի իրավահաջորդի ներկայացուցիչ Նորիկ Նորիկյանից. «Ըստ էության, այս առումով մեր պահանջը բավարարվել է, տեսնենք՝ իրադարձությունները ինչպես կզարգանան, ըստ այդմ էլ մեր հետագա քայլերը պարզ կլինեն»:

Փաստաբանը նաեւ տեղեկացրեց, որ ստացվել են նաեւ ծանուցագրեր, ըստ որոնց՝ իրենց կողմից ներկայացված միջնորդությունները բավարարվել են:

«Այդ ծանուցագրերով ասվում է, որ մեր կողմից 6-րդ կայազորային քննչական բաժին ներկայացված բոլոր միջնորդությունները բավարարվել են: Այսինքն, մենք մի քանի քննչական գործողություններ իրականացնելու վերաբերյալ միջնորդություններ էինք ներկայացրել, որոնք ամբողջությամբ բավարարվել են, թե ինչ արդյունք են արձանագրել, այս պահին չեմ կարող ասել, քանի որ տվյալներին չեմ տիրապետում»,-ասցա նա:

Ավելի վաղ NEWS.am-ը տեղեկացրել էր, որ Հայաստանի Զինված ուժերի Տավուշի մարզում (Շամշադինում) գտնվող զորամասերից մեկի մարտական դիրքում մահացած հայտնաբերված 19-ամյա ժամկետային զինծառայող Արսեն Մխիթարյանի մահվան գործով նախաքննությունից հարազատները դժգոհ են: Տուժող կողմի մոտ նախաքննական մարմնի նկատմամբ անվստահություն է ձեւավորվել, քանի որ Արսենի մահվանից մի քանի ամիս  անց դեռ ոչ մի արդյունք չկա:

Արսենը ապրում էր Արմավիր քաղաքում, արհեստավորի ընտանիքում։ Նա Երեւանի պետական բժշկական համալսարանի ուսանող էր, սովորում է ատամնաբուժական ֆակուլտետում։ Նա երկու քույր ունի, որոնցից ավագը նույնպես սովորում է Բժշկական համալսարանում։

Նշենք, որ Արսեն Մխիթարյանի մահվան դեպքի առթիվ հարուցվել է քրեական գործ՝ ՀՀ ՔՕ 110-րդ հոդվածի 1-ին մասի հատկանիշներով՝ ինքնասպանության հասցնելը:

Ըստ ՔԿ տվյալների՝ 2016թ. հուլիսի 3-ին՝ ժամը 10:30-ի սահմանում, ՀՀ ՊՆ N զորամասի մարտական դիրքում հայտնաբերվել է ժամկետային զինծառայող, շարքային Արսեն Մխիթարյանի դին՝ կզակի շրջանում մահացու հրազենային վնասվածքով։