Ազգային ժողովում այսօր՝ հոկտեմբերի 26-ին 5 խմբակցություններ՝ ՀՀԿ, ՀՅԴ, ՕԵԿ, ՀԱԿ, ԲՀԿ, ստորագրեցին ՄԱԿ-ի զարգացման ծրագրին ուղղված նամակը` խնդրելով, որ ՄԱԿ-ն իր փորձառությունը, դերակատարումն ունենա Ընտրական օրենսգրքի հետ կապված քաղաքական ուժերի համաձայնագրով նախատեսվող տեսախցիկների տեղադրմանը:
Նամակի ստորագրումից հետո ՀԱԿ խմբակցության ղեկավար Լեւոն Զուրաբյանը լրագրողներին ասաց, որ ՄԱԿ-ն ընտրության օրը նախագծի իրագործման այլ բաղադրիչներում իր փորձառությունը պետք է բերի: Նա նշեց, որ տեսասարքերի միջոցով տեսագրվելու եւ առցանց հեռարձակում է իրականացվելու բոլոր ընտրատեղամասերից:
«Գլխավոր նպատակն այն է, որ լինի հանրային վերահսկողություն օրինականության նկատմամբ եւ բացառվեն խախտումները` ապօրինի քվերակություններ, բռնություններ, քվեաթերթիկների հետ մանիպուլյացիաներ եւ այլն»,- ասաց Լեւոն Զուրաբյանը` հավելելով, որ ոչ ոք քրեական օրենսգիրքը ուղիղ եթերում խախտելու ցանկություն չի ունենա:
ԲՀԿ խմբակցության ղեկավար Նաիրա Զոհրաբյանի խոսքով` ծրագրի ֆինանսավորումը ԵՄ կողմից է` 2 մլն եվրո. «ՄԱԿ-ը` որպես բոլոր քաղաքական ուժերի կողմից առավել վստահություն ունեցող կառույց, ինքը իրականացնի տեսանկարահանման ողջ գրոծընթացը, որպեսզի այն չլինի իշխանության, ընդդիմության կամ որեւէ քաղաքական ուժի կազմակերպման խնդիրը` հետագայում շահարկումներից խուսափելու համար»:
