Ֆինանսների նախարար Վարդան Արամյանն այսօր՝ հոկտեմբերի 26-ին, խորհրդարանում խոսել է Ֆինանսների նախարարության այն ուսումնական կենտրոնի մասին, որը գտնվում է Երեւանում, ոչ թե «Դիլիջան» ուսումնական կենտրոնի: Այս մասին NEWS.am-ի թղթակցի հետ զրույցում պարզաբանել է նախարարի մամուլի քարտուղար Լուսինե Մկրտչյանը:
«Լրագրողների հարցադրմանը ՊՈԱԿ-ների վերաբերյալ ի պատասխան նախարարը նկատի է ունեցել Ֆինանսների նախարարության ուսումնական կենտրոնը, որը գտնվում է ոչ թե Դիլիջանում, այլ Երեւանի Ուլնեցի փողոցում: Ինչ վերաբերում է Դիլիջանի ուսումնական կենտրոնին, այն եղել է Ֆինանսների նախարարության ենթակայության ներքո միայն այն ժամանակահատվածում, երբ ՊԵԿ-ը միացված է եղել Ֆինանսների նախարարությանը: Հետագայում կառույցների տարանջատման արդյունքում Դիլիջանի ուսումնական կենտրոնը 2016թ. մարտի 17-ի Կառավարության 329-Ն որոշմամբ, ՊԵԿ-ին պատկանող այլ գույքի հետ վերադարձվել է»,- ասաց Լուսինե Մկրտչյանը:
Հիշեցնենք, որ խորհրդարանում լրագրողները հետաքրքրվել էին Ֆինանսների նախարարության այն ուսումնական կենտրոնով, որի մասին այդքան խոսվեց: Նախարարը մասնավորապես ասել էր. «Ինչ վերաբերում է կենտրոնին, ասեմ, որ դա ՊՈԱԿ է, որը կամ լուծարվում է, կամ վերաիմաստավորվում է, վաճառքի չի հանվում: Ես կարծում եմ, որ մենք գնալու ենք այն ճանապարհով, որ լուծարենք, որովհետեւ մենք ունենք խնդիր, որ ուսումնական հաստատությունները քիչ են աշխատում պետության հետ: Դա նրանից է, որ մենք ստեղծում ենք կառույցներ, որոնք արդյունավետ չեն աշխատում պետության հետ»:
