Եթե կա դրսի հետք, ապա դա արվել է ներսի հայերի ձեռքով. Զուրաբյանը: Այս մասին, այսօր՝ հոկտեմբերի 27-ին, ԱԺ-ի այգում «Հոկտեմբերի 27-ի» ողբերգության 17-րդ տարելիցի արարողության ժամանակ լրագրողների հետ զրույցում նշել է ՀԱԿ խմբակցության ղեկավար Լեւոն Զուրաբյանը:
«Ես չեմ ցանկանում որեւէ շահարկում անել: Կարծում եմ, որ առաջին հերթին պետք է կարգուկանոն հաստատել սեփական տանը: Եթե անգամ կա դրսի հետք, դա արվել է տեղացիների՝ հայերի ձեռքով: Հետեւաբար պետք է գտնվեն այն մարդիկ, որոնք լինելով Հայաստանից, ՀՀ իշխանությունից միգուցե, այդ ոճրագործության մեջ ունեն իրենց մեղսակցությունը: Եթե դա արվի, դրսի ձեռքը կբռնվի, եթե այդպիսին կա»,-ասաց նա:
Հարցին, թե արդյոք «Հոկտեմբերի 27»-ի ոճրագործությունը ազդել է ԼՂ հակամարտության կարգավորման վրա, Զուրաբյանն արձագանքեց. «Բնական է, որ երկրում անկայունությունը, որն առաջանում է նման ոճրագործությունների պատճառով, կարող է ազդեցություն ունենալ ԼՂ խնդրի վրա, բանակցային գործընթացի վրա, բայց իհարկե, մեծ հաշվով ԼՂ խնդրի չկարգավորման պատճառները շատ ավելի ֆունդամենտալ են»:
Հիշեցնենք, որ 17 տարի առաջ` հոկտեմբերի 27-ին, ոճրագործների խումբը` Նաիրի Հունանյանի գլխավորությամբ, ներխուժեցին Հայաստանի Ազգային ժողովի նիստերի դահլիճ եւ դիմահար կրակոցներով սպանեցին կառավարության եւ խորհրդարանի անդամներին:
Ահաբեկչության զոհ դարձան երկրի վարչապետ, Սպարապետ Վազգեն Սարգսյանը, խորհրդարանի նախագահ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը եւ Միքայել Քոթանյանը:
Ահաբեկիչների նկատմամբ դատավարությունը տեւեց 2001-2003 թվականները: 6 ահաբեկիչները, այդ թվում` նրանց ղեկավար Նաիրի Հունանյանը, նրա եղբայր Կարեն Հունանյանը, նրա քեռին՝ Վռամ Գալստյանը, Դերենիկ Բեջանյանը, Էդիկ Գրիգորյանը եւ Աշոտ Կնյազյանը դատապարտվեցին ցմահ ազատազրկման: Համլետ Ստեփանյանը դատապարտվեց 14 տարվա ազատազրկման:
3 տարի տեւած դատավարությունն այդպես էլ չկարողացավ կամ չցանկացավ վեր հանել ահաբեկչության կազմակերպիչներին եւ մինչ օրս էլ հասարակությունը լուրջ կասկածներ ունի կազմակերպիչների մասով:
