Գերմանիայի յուրաքանչյուր երրորդ բնակիչը վախենում է, որ Ռուսաստանի հետ պատերազմ կսկսվի։ Գերմանական Frankfurter Allgemeine թերթի փոխանցմամբ նման տվյալներ են ստացվել այն հարցման արդյունքում, որն անցկացրել է Forsa հետազոտական ինստիտուտը։ Հարցման մասնակիցների մնացած 64 տոկոսը հայտնել է, որ չի վախենում ՌԴ հետ պատերազմից։

Նաեւ հարցումը ցույց է տվել, որ գերմանացիների 41 տոկոսը համարում է, որ արեւմտյան երկրների ու Ռուսաստանի հարաբերություններում «ամեն ինչ վատ» է, 51 տոկոսը համարում է, որ դրանք «այդքան էլ լավ վիճակում չեն», եւ միայն 6 տոկոսն է դրանք անվանել «լավ»։

Գերմանիայի քաղաքացիների 84 տոկոսը նաեւ ճիշտ է համարում այն, որ կանցլեր Անգելա Մերկելը շարունակում է երկխոսությունը ՌԴ նախագահ Վլադիմիր Պուտինի հետ։ Դա անիմաստ է համարում միայն 14 տոկոսը։

Մինչդեռ պատերազմի կապակցությամբ վախերը սնում են թե՛ ՆԱՏՕ-ի, թե՛ Ռուսաստանի ռազմական ծրագրերը։ Մասնավորապես Բրյուսելում օրերս անցել է ՆԱՏՕ-ի պաշտպանության նախարարների հանդիպումը, որի ժամանակ քննարկվել է Արեւելյան Եվրոպայում զորքերի տեղակայումը։ Պարբերականը հիշեցնում է, որ ապագայում Լեհաստանում, Էստոնիայում, Լատվիայում ու Լիտվայում կտեղակայվեն ՆԱՏՕ մի քանի հազար զինծառայողներ։ Այդ ծրագրերը ՆԱՏՕ-ի պատասխանն էին արեւելաեվրոպական պետությունների մտավախություններին, որ «իրենք կարող են հայտնվել Կրեմլի տեսադաշտում»։