Շվեյցարիան մոտ է հայ ժողովրդին, ինչպես Ֆրանսիայում ֆրանսիացիները մոտ են կանգնած հայ ժողովրդին: Եվ երբ երկրները մոտ են կանգնած ժողովրդին, մեքենաբար նրանք զգում են նաեւ կապվածություն երկրի նկատմամբ: Ամեն անգամ, երբ քաղաքական գործիչներ են եկել Ֆրանսիա կամ Շվեյցարիա նրանց վարքագիծն ու պահվածքը եղել է միշտ հիասքանչ: Նրանք ջերմ են, բաց են, հումորի զգացում ունեն, իսկ սա շատ մեծ նշանակություն ունի վարքագծի տեսակետից: Այս մասին ասել է աշխարհահռչակ շանսոնյե, Շվեյցարիայում Հայաստանի դեսպան Շառլ Ազնավուրը «Արմեդիա»-ին տված հարցազրույցում: Ըստ Ազնավուրի՝ այս կարծիքը ճշմարիտ է հայկական երեք նախագահների դեպքում էլ: «Բոլոր դեպքերում հայերն այն ժողովուրդն են, ում Ֆրանսիայում անվանում են «օրինակելի սփյուռք»: Այստեղ ավելի մոտ են հայերին, քան թուրքերին»,- նշել է նա:
Հարցին, թե բարեկամական ջերմ հարաբերությունները ժողովուրդների միջեւ ինչպե՞ս են արտահայտվում իրական քաղաքականության մեջ, շանսոնյեն պատասխանել է. «Հիանալիորեն, առանց որեւէ խնդրի: Չպետք է մոռանանք, որ «հայ», «հայազգի մարդ» բառերն ինձ հետ են ասոցացվում եւ այստեղ պոպուլյար են դարձել տարիներ առաջ` մոտ 60 տարուց ավելի: Ասում են` «այդ Դուք էլ եք հա՞յ, Ազնավուրի պես»: Սա մեքենաբար է գալիս մարդկանց մտքին»:
Գնահատելով հայ-շվեյցարական համագործակցությունը՝ Ազնավուրը դրանք հիանալի է որակել: «Ես տպավորություն ունեմ, որ դեռ ավելի պետք է լավանա: Շվեյցարիան այն երկրների թվին է պատկանում, որոնք բավականին շուտ ճանաչեցին Հայոց ցեղասպանությունը: Այլ երկրներում այս գործընթացն առավել երկար ճանապարհ անցավ: Այստեղ 2003-ին դա տեղի ունեցավ: Պետք է ասել, որ պարոն Ժակ Շիրակի ավանդը եւս մեծ է այդ հարցում, նա մեծ հեղինակություն է վայելում նաեւ իր երկրի սահմաններից դուրս, ուստի այդ հարցում հետեւեցին նրա օրինակին»:
