Քառօրյա պատերազմում վիրավորված ժամկետային զինծառայող Ավետիս Զարգարյանն արդեն պետք է Հնդկաստանում լիներ՝ վերականգնողական բուժում ստանալու, սակայն Պաշտպանության նախարարության համապատասխան վարչությունը մեկ ամսից ավելի չի կարողանում ինքնաթիռի հարց լուծել:
Ավետիս Զարգարյանի բուժման ծախսերը պետք է հոգա «Հայկական վիրավոր հերոսների հիմնադրամ» կազմակերպությունը, թեեւ Կառավարությունը դեռ ապրիլին որոշում կայացրեց՝ այն զինծառայողները, որոնց հետագա բուժումն այլեւս հնարավոր չէ Հայաստանում կազմակերպել, պետության միջոցներով արտերկրում բուժում կստանան: Ինչպես միշտ որոշումը կայացվեց եւ անմիջապես մոռացվեց: Ավելի քան 6 ամիս է անցել քառօրյա պատերազմից, սակայն ոչ մեկի բուժումն արտասահմանում այդպես էլ չկազմակերպվեց: Սեպտեմբերին միայն Պաշտպանության նախարարությունը հայտարարեց, որ Թալիշում ծանր վիրավորում ստացած Ավետիս Զարգարյանը հետագա բուժումը կշարունակի Հնդկաստանի «Արտեմիս» բժշկական կենտրոնում, իհարկե բարեգործական հիմնադրամի միջոցներով: Ըստ ծնողներին տրամադրած տեղեկատվության՝ մնացել են միայն տեխնիկական հարցեր, այն է՝ ինչպես տեղափոխել Ավետիսին Հնդկաստան: Ու այսպես, նախարարությունը 1,5 ամիս է՝ փնտրում է օդանավ, որով կարող է վիրավոր զինծառայողին տեղափոխել, սակայն... չի գտնում:
Նշենք, որ Ավետիսի կոկորդի խողովակն օրերս հեռացրել են, նա առաջիկայում նաեւ ծնոտի վիրահատության կենթարկվի, թեեւ նախապես որոշվել էր, որ եթե Հնդկաստան մեկնի, այնտեղ էլ կվիրահատվի:
Հիշեցնենք, որ Ավետիսը Ռուսաստանից էր եկել՝ ծառայության նպատակով, ընտանիքը Հայաստան է վերադարձել ապրիլին, Ավետիսի վիրավորվելու մասին իմանալուց հետո: Շուրջ 5 ամիս է՝ Ավետիսի ծնողներն ապրում էին բարեկամներից մեկի տանը, օրերս ստիպված բնակարան են վարձել եւ տեղափոխվել: Ինչպես են տան վարձը վճարելու, իրենք էլ չեն պատկերացնում. Ավետիսի մայրն ամբողջ օրը հիվանդանոցում է, որդուն է խնամում, իսկ հայրը դեռ աշխատանքի չի գտել: Հայաստան է վերադարձել նաեւ Ավետիսի եղբայրը, որը հաջորդ տարի պետք է ծառայության մեկնի:
