Ծածկարան մուտք գործելիս ժամկետային զինծառայող Գառնիկ Ավետիսյանին մահացու վրաերթի ենթարկելու մեջ մեղադրվող Հայկ Հարությունյանը դատապարտվեց 1 տարվա ազատազրկման:
Նշենք, որ ըստ մեղադրական եզրակացության՝ ժամկետային զինծառայող Հայկ Հարությունյանն այս տարվա ապրիլի 11-ին ժամը 15:35-ի սահմաններում, Զիլ-131 մակնիշի ավտոմեքենայի անվադողերը լիցքավորելու նպատակով իրեն ամրակցված մեքենայով ծածկարան մուտք գործելիս մահացու վրաերթի է ենթարկել ավտոմեքենայի առջեւ կանգնած Գառնիկ Ավետիսյանին:
Հարությունյանին մեղադրանք էր առաջադրվել Քրեական օրենսգրքի 377-րդ հոդվածի 2-րդ մասով, այն է՝ մեքենաներ վարելու կամ շահագործելու կանոնները խախտելը, որն անզգուշությամբ առաջացրել է մարդու մահ: ՝
Տավուշի մարզի ընդհանուր իրավասության դատարանում դատաքննությունն անցկացվել է արագացված կարգով, քանի որ նման միջնորդություն է ներկայացրել ամբաստանյալը: Վերջինս հայտարարել է, որ առաջադրված մեղադրանքն իրեն պարզ է, համաձայն է դրա հետ: Դատարանը վճռել է 1 տարվա ազատազրկման դատապարտել ժամկետային զինծառայողին:
Պաշտպանական կողմը, սակայն, վճռի հետ համաձայն չէ եւ վերաքննիչ բողոք է ներկայացրել՝ պահանջելով Հարությունյանի նկատմամբ նշանակված պատիժը չկիրառել՝ նշանակելով փորձաշրջան: Առաջին նիստը Վերաքննիչում նշանակված է նոյեմբերի 8-ին: