1000 ԱՄՆ դոլար կաշառք վերցնելու պահին ձերբակալված Իշխան Բարսեղյանը հոկտեմբերի 31-ին երեք նիստ ուներ Շենգավիթ վարչական շրջանի ընդհանուր իրավասության դատարանում:
Ազգային անվտանգության ծառայության տարածած տեսանյութից պարզ է դառնում, որ Բարսեղյանը կաշառք է վերցրել հենց հոկտեմբերի 31-ին նշանակված նիստով ինչ որ որոշում կայացնելու համար:
Դատական տեղեկատվական համակարգից տեղեկանում ենք, որ այդ օրը Բարսեղյանն ուներ սեփականության իրավունք ճանաչելու, գույքը տիրազուրկ ճանաչելու և ձեռքբերման վաղեմության ուժով անշարժ գույքի նկատմամբ սեփականության իրավունքը ճանաչելու եւ Սերյոժա Լևոնի Ղազարյանին անգործունակ ճանաչելու վերաբերյալ նիստեր: Թե կոնկրետ որ գործով էր Բարսեղյանը կաշառք վերցնում, հայտնի չէ:
Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո: