Նախագահ Մեդվեդեւի ձգտումը՝ բանակցությունների սեղանի շուրջ նստեցնել Հայաստանի եւ Ադրբեջանի նախագահներին, վկայում է Մոսկվայի ցանկության մասին՝ կրկին արձանագրել է իր առաջնությունն այդ խաղաղարար գործընթացին: Այդուհանդերձ, որեւէ առաջընթաց այդ հարցում չի նշմարվում: «Ազատություն» ռադիոկայանի հետ զրույցում նման կարծիք է հայտնել Կենտրոնական Ասիայի եւ Կովկասի հարցերով փորձագետ Արկադի Դուբնովը:
«Կարծում եմ՝ այս անգամ Աստրախանում քննարկվելու է Հայաստանի եւ Ադրբեջանի նախագահների հնարավոր հանդիպումը Լիսաբոնում կայանալիք ՆԱՏՕ-ի գագաթաժողովում: Նրանց բանակցությունների սեղանի շուրջ նստեցնելու, հնարավոր առաջընթաց արձանագրելու փորձերն էլ նախագահ Մեդվեդեւի նպատակն են»,- նկատել է նա:
Փորձագետն անդրադարձել է ռազմական գործողությունների վերսկսման հնարավորությանն ու ասել, որ տեսական հնարավորություն միշտ էլ գոյություն ունի:
« Օբյեկտիվորեն՝այժմ ամենահաջող ժամանակը չէ ղարաբաղյան ուղղությամբ առաջընթացի համար: Առաջին, Հայաստանի ղեկավարությունը ներքաղաքական խնդիրներ ունի:Երկրորդ ավելի հաճախ ի պատասխան ադրբեջանական հայտարարությունների, ռազմատենչ հայտարարություններ են լսվում հայկական կողմից»,- ասել է Դուբնովը:
Նա նշել է, որ Իլհամ Ալիեւի այն հայտարարությանը, թե ներկայիս Հայաստանը տեղակայված է հին ադրբեջանական հողերի վրա, Սերժ Սարգսյանը բավական կոշտ եւ հզոր պատասխանեց՝ հենվելով պատմական փաստերի վրա, ինչից հետո ադրբեջանական կողմից ձայները վայրկենապես կտրվեցին, բայց նստածքը մնացել է:
