Գյումրիում եւ Վանաձորում տեղական ինքնակառավարման մարմինների ընտություններըը արձագանք չառաջացրին, քանի որ ժողովուրդն այդ ընտրությունները չի ընկալում որպես իշխանափոխության հնարավորություն: Այս մասին NEWS.am-ի հետ զրույցում հայտարարեց ՀԱԿ խմբակցության ղեկավար Լեւոն Զուրաբյանը:
Ի պատասխան խորհրդարանական ընտրությունների նախաշեմին ընդդիմության միավորման կարեւորության մասին հարցին՝ հաշվի առնելով Գյումրիում եւ Վանաձորում ՏԻՄ ընտրություններում ՀԱԿ-ի տապալումը, պատգամավորը նշեց. «Մենք պետք է լուծենք ժողովրդի մոբիլիզացիայի հարցը, որ ժողովուրդը մասնակցի 2017-ի խորհրդարանական ընտրություններին եւ քվեարկի, ընտրի Հայաստանի զարգացման ճանապարհը: Ընդդիմության միավորումը ընդամենը այս խնդիրը լուծելու գործիքներից մեկն է: Բայց սա միակ գործիքը չէ: Իհարկե, պետք է ամեն ինչ անենք ուժերը միավորելու համար, բայց եթե չհաջողվի այդ խնդիրը լուծել, դա մեր ժողովրդի համար հիասթափվելու առիթ չպետք է դառնա»: Նույնիսկ առանց միավորման էլ նշված խնդիրը կարելի է լուծել ուղերձի եւ քաղաքական թիմի ճիշտ կառուցման միջոցով:
Հարցին՝ Գյումրիում եւ Վանաձորում ՏԻՄ ընտրությունների ընթացքում ՀԱԿ-ն այդ ուղերձը չունե՞ր, պատգամավորը պատասխանեց. «Արձագանք չկար, քանի որ ժողովուրդը ՏԻՄ ընտրությունները չի ընկալում որպես իշխանափոխության հավանականություն: Հետեւաբար՝ համանման դեպքերում ժողովուրդն ավելի շուտ նյութական ձեռքբերումներին է հակված: Իսկ քանի որ նոր Սահմանադրությամբ խորհրդարանական ընտրությունները 5 տարի ժոմկետով որոշելու են Հայաստանի ամբողջ իշխանությունը, ապա, ըստ էության, դրանք փոխարինում են հին Սահմանադրությամբ նախագահական ընտրություններին»: