Սոցիալ դեմոկրատ հնչակյան կուսակցությունը շարունակում է Ծառուկյան դաշինքին միավորվելու շուրջ բանակցությունները: Այս մասին NEWS.am-ի հետ զրույցում ասել է ՍԴՀԿ ատենապետ Նարեկ Գալստյանը:
Նշենք, որ Գագիկ Ծառուկյանի դաշինքին միանալու մասին ավելի վաղ հայտարարել էին ավանդական կուսակցությունները՝ ՍԴՀԿ-ն եւ ՀՌԱԿ-ը: Ծառուկյանը երեկ դադարեցրել է ՀՌԱԿ-ի հետ համագործակցությունը՝ հիմնավորելով, որ ՌԱԿ-ի տարբեր թեւեր եւ սփուռքյան կառույցներ հանդես են եկել իրարամերժ հայտարարություններով, որ չեն կիսում ՀՌԱԿ-ի՝ խորհրդարանական ընտրություններին դաշինքով մասնակցելու ցանկությունն ու որոշումը, ինչից հետո ձեռնպահ է մնում այս փուլում ՀՌԱԿ-ի հետ դաշինքային համագործակցությունից: Տեղեկություններ էին շրջանառվում, որ դաշինքից կհեռանա նաեւ ՍԴՀԿ-ն, սակայն ատենապետը մեզ հետ զրույցում վստահեցրեց, որ նման որոշում չունեն:
Որոշ տեղեկությունների համաձայն՝ «Բարգավաճ Հայաստան» կուսակցությունում բաժանվել են երկու թեւի: Մի թեւը՝ ԲՀԿ ղեկավար Նաիրա Զոհրաբյանի գլխավորությամբ պնդում է, որ Գագիկ Ծառուկյանը գլխավորի կուսակցությունը եւ ընտրություններին մասնակցի միայն ԲՀԿ-ով: Իսկ մյուս թեւը ցանկանում է՝ Ծառուկյանը մասնակցի դաշինքով: Որոշ տեղեկությունների համաձայն՝ կրքերն այնքան են բորբոքվել, որ երեկ դաշինքին միանալու համաձայնություն տված գործիչներին, ուժերի ղեկավարներին առաջարկել են լքել դաշինքը, ոմանց էլ առաջարկել առանց կուսակցության ընդգրկվել ԲՀԿ-ի ընտրական ցուցակում:
Հիշեցնենք, որ Ծառուկյանի դաշինքում ամեն ինչ հստակեցվել էր դեռեւս անցած շաբաթ եւ պետք է կիրակի տեղի ունենար համաձայնագրի ստորագրումը, ինչը հետաձգվեց անհայտ ժամանակով: Փետրվարի 10-ին ԲՀԿ համագումարն է լինելու, որի ժամանակ էլ Գագիկ Ծառուկյանին ընտրելու են կուսակցության առաջնորդ: Ծառուկյանի՝ ԲՀԿ ղեկավարի պաշտոնին վերադառնալը հաստատել էր նաեւ Նաիրա Զոհրաբյանը շեշտելով, որ մեծ դժվարությամբ հաջողվել է համոզել նրան:
