Այսօր, նոյեմբերի 7-ին Ադրբեջանում մեկնարկել են խորհրդարանական ընտրությունները: Ընտրատեղամասերը բացվել են տեղական ժամանակով 8:00-ին եւ կփակվեն 19:00-ին:
Միլի մեջլիսի 125 պատգամավորական տեղերի համար պայքարում են 690 թեկնածուներ:
Նախընտրական քարոզարշավն ավարտվել է նոյմեբերի 6-ին, ժամը 8:00-ին: Քարոզարշավը սկսվել էր հոկտեմբերի 15-ին:
Նոյեմբերի 6-ին կայացած մամուլի ասուլիսում Ադրբեջանի Կենտրոնական ընտրական հանձնաժողովի նախագահ Մազահիր Պանախովը հայտնել է, որ ընտրելու իրավունք ունի 4 միլիոն 950 հազար ադրբեջանցի: 125 ընտրատարածքներում բացվել է 5314 ընտրատեղամաս:
690 թեկնածուներից 107-ին առաջադրել է իշխող «Նոր Ադրբեջան» կուսակցությունը: Ընդդիմադիր կուսակցությունները ներկայացնում են 140 թեկնածուներ, հաղորդում են ադրբեջանական լրատվամիջոցները:
Ընտրական գործընթացը վերահսկելու համար ընտրատեղամասերում տեղադրվել է 500 տեսախցիկներ: Գրանցվել է 46 հազար 639 տեղական դիտորդ: ԿԸՀ-ի վերջին տվյալներով միջազգային դիտորդների թիվը հասնում է 1029-ի` 21 միջազգային կազմակերպություններից, այդ թվում ԵԽԽՎ-ից, ԵՄ-ից, ԵՄ-ի Բաքվի գրասենյակից, Թուրքալեզու երկրների խորհրդարանական վեհաժողովից, ԵԱՀԿ ԽՎ-ից, ԱՊՀ-ից, ԳՈւԱՄ-ից, նաեւ ԱՄՆ-ի, Մեծ Բրիտանիայի, Ղազախստանի, Նորվեգիայի, Ճապոնիայի, Լեհաստանի դեսպանություններից: Ընդհանուր առմամբ` ներկայացված են 48 երկրներիդիտորդներ:
Ընտրությունները լուսաբանելու համար հավատարմագրվել է 18 օտարեկրյա ԶԼՄ, այդ թվում BBC, TRT, Iran TV հեռուստաընկերությունները եւ Վրաստանի Հանրային հեռուստաընկերությունը, «Reuters», «Associated Press», «France Presse», EPA, «Anadolu», «Ihlas», «Sinhua», «ITAR-TASS» լրատվական գործակալությունները:
Ազատություն ռադիոկայանի փոխանցմամբ` ընդդիմությունն արդեն հայտարարել է արդար քաղաքական պայքարի համար անհրաժշետ պայմանների բացակայության մասին: Ժողովրդական ճակատի առաջնորդ Ալի Քերիմլիի խոսքով, «Ժողովրդական ճակատ-«Մուսաֆաթ» ընտրական բլոկի թեկնածուները գրանցված են ընտրատարածքների միայն մեկ երրորդում: Բացի այդ Քերիմիլին հայտարարել է, որ քարոզարշավի ժամանակ ընդդիմության եւ լրատվամիջոցների վրա ճնշում է գործադրվել:
ԵԱՀԿ դիտորդական առաքելությունը միջանկյալ զեկույցում փաստել է ընտորղների եւ թեկնածուների վրա եղած ճնշումները, քաղաքական դեբատների բացակայությունը հեռուստաեթերում:
Ադրբեջանում 2005-ից ընտրություններն անցկացվում են միայն մեծամասնական համակարգով: Իլհամ Ալիեւի «Նոր Ադրբեջան» կուսակցության նախաձեռնությամբ, կուսակցական ցուցակներով առաջադրումը վերացվեց, ինչը վարչական ռեսուրսի ակտիվ օգտագործման պայմաններում գործնականում բացառում է ընդդիմադիրների ընտրվելու հնարավորությունը:
