ԵԱՀԿ Ժողովրդավարական հաստատությունների եւ մարդու իրավունքների գրասենյակը հրապարակել է Ադրբեջանում նոյեմբերի 7-ին կայացած խորհրդարանական ընտրությունների ամփոփիչ եզրակացությունը՝ խստորեն քննադատեով Ադրբեջանի իշխանություններին:
Փաստաթղթում նշվում է, որ թեեւ ընտրություններն անցել են խաղաղ մթնոլորտում, ընդհանուր առմամբ, որեւէ առաջընթաց չի արձանագրվել: «Հիմնարար ազատությունները սահմանափակվել են, քաղաքական երկխոսությունը ազատ եւ անկախ մամուլում անհնար է եղել:
Լրատվամիջոցների վիճակում միայն վատթարացում է նկատվել՝ ներառյալ ճնշումներ լրագրողների դեմ, անգամ ձերբակալություններ»,- ասված է եզրակացության մեջ:
Ընտրությունների օրը միջազգային դիտորդները բացասական են գնահատել ընթացքը 1247 ընտրատարածքների 11 տոկոսում: Այնտեղ լուրջ խախտումներ են արձանագրվել: Ամենատարածվածը եղել է կրկնակի քվեարկությունը:
Ձայների հաշվարկը բացասաբար է գնահատվել 152 տեղամասերից 47-ում: Քվեատուփերում ավելի շատ թերթիկներ են եղել, քան իրականում քվեարկել են: