Հայաստանում ԱՄՆ դեսպան Մարի Յովանովիչը շարունակում է իր շրջագայությունը Միացյալ նահանգներով, որտեղ հանդիպումներ է անցկացնում այդ երկրի հայկական համայնքի հետ։ Ինչպես հաղորդում է «Asbarez»-ը, Լոս-Անջելես այցելելուց հետո, Յովանովիչը մեկնել է Վաշինգտոն։ Այնտեղ նա Կոնգրեսի Գրադարանում տեղի հայ համայնքի հետ քննարկել է Կովկասի խնդիրները, Հայոց Եղեռնի ճանաչման հարցը։ Դեսպանը մեկնաբանել է ԱՄՆ նախագահ Բարաք Օբամայի դիրքորոշումը ցեղասպանության հարցի շուրջ։ Առաջ անցնելով, գրում է աղբյուրը, նշենք, որ Յովանովիչի պատասխանները որքան լավատեսական, նույնքան էլ հիասթափեցնող էին։
Թերթը մասնավորապես գրում է, «ԱՄՆ դեսպանը իր խոսքը սկսեց Հայաստանում գործերի ներկա վիճակից՝ արտահայտվելով ժողովրդավարության եւ անվտանգության մասին։ Համայնքի ներկայացուցիչ Քեյթ Նահապետյանի այն հարցին, թե արդյոք չի վախենում կորցնել աշխատանքը, եթե 1915-1923թթ իրադարձությունները որակի որպես ցեղասպանություն, Յովանովիչը պատասխանեց, որ չի ցանկանում հրապարակել „անձնական տեսակետները“։ Նշենք, որ Երեւանում ԱՄՆ նախկին դեսպան Ջոն Էվանսի հետկանչման պատճառը նրա կողմից Եղեռնի հրապարակային ճանաչումն էր։
Լեո Սարգսյանի եւ Հովհանես Գասպարյանի այն հարցին, թե Օբամայի աշխատակազմի կողմից ինչու է կրճատվել ֆինանսական օգնությունը Հայաստանին, Յովանովիչը պատասխանել է, որ 2010թ-ի ֆինանսական օգնությունը (30մլ դոլար) գերազանցում է Ջորջ Բուշի օրոք, մեկ տարի առաջ տրամադրած գումարին (24մլ դոլար)։ Հետեւաբար, Օբամայի վարչակազմի առաջարկած գումարը 6 մլն. դոլարով ավել է, ասել է դիվանագետը։
Յովանովիչը պատասխանել է նաեւ մի շարք այլ հարցերի։ Ամփոփելով ասվածը, հարկավոր է նշել, որ ԱՄՆ դեսպանի հետ հանդիպումից հայկական համայնքը դժգոհ եւ հիասթափված է», եզրակացրել է հայկական թերթը։
