Ղազախստանի նախագահ Նուրսուլթան Նազարբաեւը, ելույթ ունենալով ԵԱՀԿ գագաթաժողովում, մի շարք առաջարկներ է արել: Մասնավորապես նա առաջարկել է ԵԱՀԿ անվտանգության հաստատություն ստեղծել եւ այն տեղակայել Աստանայում:
«Կարծում եմ՝ ԵԱՀԿ-ի համար օգտակար կլիներ աշխատել անվտանգության տարբեր խնդիրների կանխատեսման ուղղությամբ: Որպես առաջին քայլ առաջարկում եմ ստեղծել ԵԱՀԿ անվտանգության հաստատություն»,- ասել է նա:
Նա նաեւ կոչ է արել ԵԱՀԿ անդամներին մշակել համալիր ռազմավարությունը Աֆղանստանում իրավիճակի կարգավորման ուղղությամբ: Ըստ նրա՝ ԵԱՀԿ 43 անդամներ ներգրավված են Աֆղանստանի խնդրահարույց հանգույցում:
Ղազախստանի նախագահն առաջարկում է նաեւ հավասարաչափ բաժանել ԵԱՀԿ կառույցները կազմակերպության լիազորությունների ողջ շրջանակով: Նազարբաեւը նաեւ կոչ է արել ընդունել ոչ ատոմային աշխարհի համընդհանուր հռչակագիր:
Ինչպես արդեն հայտնելէ NEWS.am-ը, դեկտեմբերի 1-ին Աստանայում մեկնարկել է ԵԱՀԿ գագաթաժողովը, որին մասնակցում է անեւ Հայաստանի նախագահ Սերժ Սարգսյանի գլխավորած պատվիրակությունը: