Ադրբեջանը շարունակաբար մերժելով միջնորդների կողմից արված առաջարկները, այդ թվում եւ այս տարվա հունիսին, հոկտեմբերին եւ նոյեմբերին ներկայացված տարբերակները, ըստ էության, փորձում է օգտագործել բանակցություններն իբրեւ շղարշ` նոր արկածախնդրություններ նախապատրաստելու համար: Այս մասին այսօր` դեկտեմբերի 3-ին «Արմենպրեսին» տված հարցազրույցում հայտարարել է Հայաստանի ԱԳ նախարար Էդվարդ Նալբանդյանն` անդրադառնալով Աստանայում ԵԱՀԿ գագաթաժողովում Ադրբեջանի դրսեւորած վարքին: Նրա խոսքով, նույն ապակառուցողականությունը Ադրբեջանը դրսեւորել էր նաեւ ԵԱՀԿ 2008 թ. դեկտեմբերին Հելսինկիի, 2009 թ. դեկտեմբերին Աթենքի, 2010 թ. հուլիսին Ալմաթիի նախարարական համաժողովների ժամանակ եւ թերեւս առավել ակնհայտ կերպով` Աստանայում:
«Այս մասին ԵԱՀԿ գագաթաժողովին իր ելույթում նշեց Հայաստանի նախագահը: Ադրբեջանական իշխանություններն ամիսներ շարունակ օրը 24 ժամ խոսում են իրենց համբերության մասին եւ չեն ցանկանում գիտակցել, որ սպառվում է միջազգային հանրության համբերությունը` հանդուրժելու Ադրբեջանի սադրիչ ապակառուցողականությունը»,- ասել է Նալբանդյանը:
Ինչ վերաբերում է նրան, որ Ադրբեջանի բարձրաստիճան պաշտոնյաների կողմից ներկայացված հայտարարություններում փորձ է արվում խեղաթյուրված ներկայացնել Աստանայի հնգակողմ հայտարարությունը, Հայաստանի ԱԳՆ ղեկավարն արձագանքել է «Գիտեք, Ադրբեջանի քարոզչության համար արդեն ավանդույթ է դարձել իր հասարակական կարծիքի համար ստեղծել փրփուրներ եւ փորձել կառչել դրանցից: Հայաստանը, ինչպես եւ նախկինում, շարունակելու է իր ջանքերը ղարաբաղյան հիմնախնդրի խաղաղ կարգավորման ուղղությամբ` միջնորդների ներկայացրած առաջարկությունների հիման վրա»:
